Բոլորին սահման «քշող» Անդրանիկ Քոչարյանի որդիներն արտոնյա՞լ են

Անդրանիկ Քոչարյանի աշխատասենյակից մինչև Պաշտպանության հանձնաժողովի սենյակ Անդրանիկ Քոչարյանը փորձում էր կանխել Սուրեն Պապիկյանին լրագրողների կողմից ուղղվող հարցերը՝ մեկ նրանց հորդորելով մի կողմ գնալ, մեկ մեղադրելով, որ պատնեշ են կառուցել և թույլ չեն տալիս անցնել։ Քոչարյանը Քոչարյան չէր լինի, իհարկե, եթե իր ոճի մեջ լրագրողներին չուղարկեր սահման ծառայելու: «Այսպես որ, առաջնագծում ծառայեք, այնքան լավ կլինի»- նշեց պատգամավորը:

Ամիսներ առաջ էլ Քոչարյանը ընդդիմադիր երիտասարդներին էր սահման ուղարկում, նա, մասնավորապես, կոչ էր անում ՀՀ ոստիկանությանը և Ազգային անվտանգության ծառայությանը՝ հավաքագրել նշված քաղաքացիների տվյալները և դրանք փոխանցել ՀՀ պաշտպանության նախարարությանը, որն էլ, իր հերթին, կօգտագործի այդ «լավ պատրաստված», պարզ հրահանգներ կատարելու ունակ երիտասարդներին՝ մեր բանակի մոբիլիզացիոն ռեսուրսը հարստացնելու և նրանց Հայաստանի ու Արցախի սահմանների անվտանգության պահպանման գործում ներգրավելու նպատակով։

Ուշագրավն այս պատմության մեջ այն է, որ ըստ մամուլի հրապարակումների՝ հայրենասեր Անդրանիկ Քոչարյանը իր որդուն բանակից հասցրել է ազատել: Ցիտում ենք՝  2019թ․ հունիսի 16-ը, մինչ 2020 թվականի 02․20-ը, այսինքն՝ ասպիրանտուրան ավարտելուց հետո շուրջ 8 ամիս շարունակ լինելով զինապարտ, երկու անգամ չի զորակոչվում։ Պարզվում է, որ հենց այդ շրջանում Լևոն Անդրանիկովիչը ունենում է «առողջական խնդիրներ» և անմիջապես ստանում է տարեկետում։ Օրինակ, 2019 թվականի մայիսի 16-ին հայտարարված է եղել զորակոչ ու Լևոնը ասպիրանտուրան ավարտելուց հետո, ստանում է տարեկետում։ Բոլոր 18 տարեկանները, ուսումն որևէ փուլում ավարտածները, չեն ստանում տարեկետում, իսկ Լևոնը ստանում է։ Թե, ինչ «առողջական խնդիր է» լինում, ոչ ոք տեղյակ չէ։ 

Համաձայն նույն աղբյուրի՝ Քոչարյանը իր մյուս որդուն էլ պարզապես փախցրել է պատերազմի թեժ կետերից: Այսքանից հետո, իհարկե, անչափ ուշագրավ պատկեր է ստացվում, երբ այդ նույն Անդրանիկ Քոչարյանը ուրիշների որդիներին սահման ուղարկելով է ցանկանում լուծել այդ սահմանի անվտանգության հարցերը: Ստացվում է, որ Նոր Հայաստանում կան արտոնյալներ և այդ արտոնյալների շարքում, ի թիվս այլոց, նաև Անդրանիկ Քոչարյանի որդիներն են...