Մոր կարճ՝ «վայ»-ը լսեցի, մտածեցի՝ երեւի երեխային է սաստում. Պեմզաշենի դաժան սպանության գործով վկա. Mediahub.am

Շիրակի մարզի Պեմզաշեն գյուղում 31-ամյա կնոջը եւ նրա երկու երեխային դաժանաբար սպանելու վարույթով վկան mediahub.am-ի հետ զրույցում պատմել է, որ դեպքի պահին լսել է մոր ձայնը։

«Ոճիր, որը կարող էր կանխվել, բայց ակամա կատարվեց տականքի շնորհիվ, տականքի ձեռքերը չկանխվեց։ Վկան ես եմ։ Գիշերվա կեսին լացի ձայնը լսեցի, բայց չկարողացա կանխել, որովհետեւ հայի պես մտածեցի՝ երեւի մայրն իր երեխային սաստում է։ Մոր կարճ՝ «վայ»-ը լսեցի ու երեխայի լացի ձայնը, ինչ իմանայի, որ ոճիր էր կատարվում»,- պատմեց վկան։

Նա ասաց, որ մոր ձայնը լսել է ժամը 00։30-ից 00։40-ի սահմաններում։

Ավելի վաղ հայտնել էինք, որ նոյեմբերի 9-ին Շիրակի մարզի Պեմզաշեն գյուղում դաժան սպանություն էր տեղի ունեցել. սեփական բնակարանում գտել էին 31-ամյա բնակչուհու եւ վերջինիս 12-ամյա դստեր եւ 8-ամյա որդու մարմինները: Մահացածներն են մայրը՝ 31-ամյա Զարինեն, ու նրա երկու երեխաները՝ 12 տարեկան դուստրը եւ 8 տարեկան որդին։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 155-րդ 1-ին մասով՝ սպանության եւ նույն հոդվածի 2-րդ մասի 5-րդ կետով՝ անչափահասի սպանության հատկանիշներով։

Դաժան սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչը, որը ոստիկանությունում տվել է ինքնախոստովանական ցուցմունք, հաջորդ օրը ձերբակալվել է նաեւ հանցանքը ենթադրաբար կատարած երկրորդ անձը՝ 36-ամյա տղամարդ։ Տղամարդիկ, ըստ գյուղի բնակիչների, ազգականներ են, երկուսն էլ ամուսնացած են, ունեն երեխաներ։ Սպանված կնոջ ամուսինը ՌԴ-ում էր՝ արտագնա աշխատանքի, վերադարձել է ողբերգական դեպքից հետո։