ՄԱԿ-ի Գլխավոր ասամբլեան Ուկրաինայի վերաբերյալ նոր հակառուսական բանաձև է ընդունել. ինչպես է քվեարկել Հայաստանը

ՄԱԿ-ի Գլխավոր ասամբլեան ձայների մեծամասնությամբ ընդունեց «Ուկրաինայի դեմ ագրեսիայի հետ կապված միջոցների և փոխհատուցումների տրամադրում» բանաձեւը, որը պատրաստվել էր Ուկրաինայի կողմից ավելի քան հիսուն երկրների համահեղինակությամբ։ Այս մասին հայտնում է Ukrinform-ը։

Կողմ է քվեարկել 94 երկիր, դեմ՝ 13, ձեռնպահ՝ 74 երկիր։

Դեմ են քվեարկել՝ Բելառուսը, Կենտրոնական Աֆրիկյան Հանրապետությունը, Չինաստանը, Կուբան, Հյուսիսային Կորեան, Էրիթրեան, Եթովպիան, Իրանը, Մալին, Նիկարագուան, Ռուսաստանը, Սիրիան, Զիմբաբվեն։

Հայաստանը ձեռնպահ է քվեարկել, Թուրքիան՝ կողմ, իսկ Ադրբեջանը չի մասնակցել քվեարկությանը։

Բանաձևը վերահաստատում է ՄԱԿ-ի պետությունների դիրքորոշումը՝ ի պաշտպանություն Ուկրաինայի ինքնիշխանության, անկախության, միասնության և տարածքային ամբողջականության, և Ռուսաստանից պահանջ՝ անհապաղ դադարեցնել ուժի կիրառումը և ամբողջությամբ և անվերապահորեն դուրս բերել իր բոլոր զինված ուժերը Ուկրաինայի տարածքից՝ իր միջազգայնորեն ճանաչված սահմաններում:

Գլխավոր ասամբլեան ընդունում է, որ Ռուսաստանը պետք է պատասխանատվություն կրի միջազգային իրավունքի, մասնավորապես՝ իր ագրեսիայի, ինչպես նաև միջազգային մարդասիրական իրավունքի և մարդու իրավունքների խախտման համար։ Ըստ այդմ, Ռուսաստանի համար իրավական հետեւանքները պետք է ներառեն Ուկրաինային պատճառված վնասի փոխհատուցումը։