Գարիկ Սարգսյանին «փո՞ւռը կտան». «մութ ամպեր»՝ Փաշինյանի յուրայինի գլխավերևում

Գլխավոր դատախազության պետական շահերի պաշտպանության վարչությունում   Պետական գույքի կառավարման կոմիտեից ստացված փաստաթղթերի ուսումնասիրությամբ պարզվել է, որ մասնավորեցվել է   «Գույքի գնահատման և աճուրդի կենտրոն» ՊՈԱԿ-ի կողմից 10 մլրդ 256 մլն 372,3 հազար դրամ գնահատված արժեքով «Արաբկիր» բժշկական համալիր-երեխաների և դեռահասների առողջության ինստիտուտ» ՍՊԸ-ի 5,6 % պետական բաժնեմասը՝ 574 մլն 356.9 հազար դրամով:

Գլխավոր դատախազության հանրային կապերի բաժնից հայտնում են. «ՊՈԱԿ-ի գնահատողի կողմից կազմված և նույն ՊՈԱԿ-ի գլխավոր տնօրենի կողմից հաստատված գնահատման երկու հաշվետվություններով՝ պետական 5,6 տոկոս բաժնեմասով «Արաբկիր» ընկերությանը պատկանող 7 մլրդ 422 մլն 87 հազար  դրամ ընդհանուր արժեքով Երևան քաղաքի Մամիկոնյանց 30 հասցեում գտնվող 22145 քմ մակերեսով շինությունները, 17678 քմ մակերեսով հողամասը և Փափազյան 32 հասցեում գտնվող 2980 քմ մակերեսով շինություններն ու 9369 քմ մակերեսով հողամասը գնահատվել են 5 մլրդ 722 մլն 87 հազար դրամ (95 մլն դրամով նվազել է ՍՊԸ-ի պետական 5,6 տոկոս բաժնեմասի արժեքը և հիմք է ընդունվել դրա մասնավորեցման համար): Արդյունքում, ՍՊԸ-ի բաժնեմասը օտարվել է 287 մլն 178 հազար 400 դրամով կամ  95 մլն դրամով պակաս` իրական արժեքից:

Վերը նշված ՊՈԱԿ-ը գործում է պետգույքի կառավարման կոմիտեի ենթակայության ներքո, դեպքն էլ արձանագրվել է այն ժամանակ, երբ կոմիտեի նախագահը եղել է Գարիկ Սարգսյանը, ով այժմ Վեդիի քաղաքապետն է, իսկ «Գույքի գնահատման եւ աճուրդի կենտրոն» ՊՈԱԿ-ի տնօրենը եղել է Արման Աբրահամյանը, ով պաշտոնից ազատվել է Առնակ Ավետիսյանի օրոք՝ 2022 թվականի հուլիսի 1-ին։ Հարց է առաջանում՝ ինչպես է եղել, որ Գարիկ Սարգսյանի «քթի տակ» նման սխեմաներ են աշխատացրել, անգամ եթե պատկերացնենք, որ վերջինս որևէ կերպ այդ սխեմաների մասին տեղյակ չի եղել, ապա առնվազն գործ ունենք պաշտոնյայի կողմից ցուցաբերած հանցավոր անգործության դեպքի հետ, որի պատճառով պետությանը լուրջ վնաս  է հասցվել: Արդյոք այս քրեական գործի ընթացքում Գարիկ Սարգսյանի գլխավերևում մութ ամպեր կկուտակվեն, թե ինչպես և նոր Հայաստանում  հարուցված քրեական գործերի մեծ մասի դեպքում, որոնց կենտրոնում այս կամ այն պաշտոնյան էր՝ փուռը կտան շատ ավելի մանր կալիբրի պաշտոնյաների...: