Արցախի պետական նախարարը քաղպաշտպանության հարցերով խորհրդակցություն է անցկացրել

Արցախի Հանրապետության պետնախարար, քաղաքացիական պաշտպանության պետ Ռուբեն Վարդանյանը դեկտեմբերի 9-ին հրավիրել է խորհրդակցություն՝ քաղաքացիական պաշտպանության  համար պատասխանատու գերատեսչությունների ղեկավարների  և պաշտոնյաների մասնակցությամբ:

Ինչպես հայտնում են Արցախի պետնախարարի աշխատակազմից, խորհրդակցության ընթացում   ներկայացվել  և  քննարկվել է Արցախի Հանրապետության քաղպաշտպանության պլանը,  փաստաթղթի վերաբերյալ ներկայացվել են առաջարկներ: Կարևոր է համարվել առկա մարտահրավերներին համահունչ, իրատեսական և կենսունակ փաստաթղթի մշակումը:

Պետնախարար Ռուբեն Վարդանյանը քաղպաշտպանության պատշաճ մակարդակով կազմակերպումն առաջնային է համարել  բնակչության անվտանգության տեսանկյունից՝ ընդգծելով, որ այն նաև  Կառավարության գործունեության գերակա խնդիրներից մեկը պետք է լինի:  Նա կարևոր է համարել  քաղպաշտպանությունում  ներգրավված գերատեսչությունների փոխգործակցված և համակարգված աշխատանքը, պարբերական ուսումնավարժանքների իրականացումը, ինչպես նաև  բնակչության շրջանում ուսումնական միջոցառումների կազմակերպումը:

Խորհրդակցության ընթացքում որոշվել է ստեղծել աշխատանքային խումբ՝ քաղպաշտպանության ոլորտին վերաբերող խնդիրների քննարկման համար։