Ռուս-իրանական ռազմական փոխգործակցությունն աճում է, և դա վտանգավոր է Իրանի հարևանների համար. Սպիտակ տուն

Ռուսաստանի և Իրանի միջև ռազմական համագործակցությունը վերածվել է «լիարժեք պաշտպանական գործընկերության» և մոտ ապագայում միայն կաճի։ Այս առիթով մտահոգություն է հայտնել ԱՄՆ նախագահի վարչակազմը, մասնավորապես՝ Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին՝ դեկտեմբերի 9-ին կայացած լրագրողների հետ զրույցում։

«Մենք կարծում ենք, որ իրանական աջակցությունը ռուսական բանակին միայն կավելանա առաջիկա ամիսներին։ Մենք նույնիսկ կարծում ենք, որ Իրանը դիտարկում է Ռուսաստանին հարյուրավոր բալիստիկ հրթիռներ վաճառելու հնարավորությունը։

Մենք նաև ունենք տեղեկություններ, որ Մոսկվան և Թեհրանը քննարկում են Ռուսաստանում մահաբեր անօդաչու թռչող սարքերի արտադրության համատեղ գիծ ստեղծելու հարցը:

Մենք Իրանին կոչ ենք անում փոխել ուղղությունը և չդիմել այդ գործողություններին»,-ասել է Քիրբին:

Քիրբիի խոսքով՝ Ռուսաստանն իր հերթին Իրանին առաջարկում է «աննախադեպ մակարդակի ռազմական և տեխնիկական աջակցություն», մասնավորապես՝ զենքի մշակման և զինվորականների պատրաստման գործում։

«Այս համագործակցության շրջանակներում մենք մտահոգված ենք, որ Ռուսաստանը մտադիր է Իրանին տրամադրել առաջադեմ ռազմական բաղադրիչներ: Մոսկվան կարող է Թեհրանին տրամադրել այնպիսի սարքավորումներ, ինչպիսիք են ուղղաթիռները և հակաօդային պաշտպանության համակարգերը: Տեղեկություններ կան, որ իրանցի օդաչուները այս գարնանը վերապատրաստվել են Ռուսաստանում՝ սովորելու, թե ինչպես թռչել Սու-35-ով, ինչը վկայում է այն մասին, որ Իրանը կարող է սկսել ինքնաթիռներ ընդունել հաջորդ տարվա ընթացքում: Այդ կործանիչները զգալիորեն կուժեղացնեն Իրանի օդային ուժերը՝ համեմատած իրենց տարածաշրջանային հարևանների հետ»,- ասել է Քիրբին՝ հավելելով, որ դա խիստ վտանգավոր է տարածաշրջանի համար: