Էրդողանն ակնարկել է, որ 2023 թվականին վերջին անգամ է առաջադրվելու իր պաշտոնում

Թուրքիայի նախագահ Ռեջեփ Թայիփ Էրդողանը շաբաթ օրը ակնարկել է, որ հաջորդ տարի վերջին անգամ է առաջադրվելու իր պաշտոնում։

Նման հայտարարություն նա արել է Թուրքիայի հյուսիսային Սամսուն քաղաքում ելույթի ժամանակ, հայտնում է Euronews-ը։

«Հուսով եմ, որ 2023 թվականին կսկսենք թուրքական դարի կառուցումը այն ուժով, որը վերջին անգամ մեր անունից կստանանք մեր ժողովրդի աջակցությունից»,- ասել է Էրդողանը։

«Մենք այս սուրբ դրոշը կփոխանցենք մեր երիտասարդությանը»,- հավելել է նա։

Շաբաթ օրը ելույթ ունենալով՝ Էրդողանն ասել է, որ իր «Արդարություն և զարգացում» կուսակցությունը Թուրքիան դարձրել է առանցքային դերակատար համաշխարհային ասպարեզում:

Նրա խոսքով՝ Անկարայի հակառակորդները չեն հրաժարվում Թուրքիայի զարգացման համար խոչընդոտներ ստեղծելու փորձերից՝ օգտագործելով նաեւ ահաբեկչության քարտեզը։

«Սակայն նրանք մոռանում են, որ ժամանակակից Թուրքիան այլևս դրսից  հրահանգով գործող պետություն չէ, այլ երկիր է, որն ինքն է ուղղորդում և հրամայում ուրիշներին»,- ընդգծել է Թուրքիայի ղեկավարը։

Թուրքիան դարձել է մի պետություն, որի գործողությունները ուշադրությամբ վերահսկվում են ամբողջ աշխարհում, հավելել է Էրդողանը։

Մինչդեռ Թուրքիայում վերջին տարիներին ռեկորդային գնաճը և լիրայի անկումը անհանգստություն են առաջացրել բազմաթիվ թուրքերի մոտ, որոնց կենսամակարդակը կտրուկ անկում է ապրել:

Հոկտեմբերին Թուրքիայի վիճակագրական ինստիտուտը զեկուցեց, որ գնաճը հասել է 24 տարվա ամենաբարձր մակարդակին՝ 85,51%, թեև շատերը պնդում են, որ իրական ցուցանիշը, հավանաբար, ավելի բարձր է:

Միևնույն ժամանակ, թուրքական լիրայի փոխարժեքը նվազել է վերջին մի քանի տարիների ընթացքում՝ բարձրացնելով ներմուծվող ապրանքների արժեքը և խաթարելով ձեռնարկությունների և տնային տնտեսությունների գնողունակությունը: