Ադրբեջանը իրավիճակի «մոնիթորիգ» է սկսում Ղարաբաղի հանքավայրերում

Ադրբեջանցի մասնագետների խումբը շաբաթ օրը Ադրբեջանի Ղարաբաղի շրջանում, որտեղ ռուս խաղաղապահներ են տեղակայված, օգտակար հանածոների հանքավայրերի շահագործման հետ կապված իրավիճակի նախնական «մոնիթորինգ» է սկսում, ասվում է Ադրբեջանի էկոնոմիկայի եւ բնապահպանության ու բնական պաշարների նախարարությունների համատեղ հայտարարության մեջ։

«2022 թվականի դեկտեմբերի 3-ին եւ 7-ին ռուսական խաղաղապահ զորախմբի հրամանատարության հետ կայացած բանակցությունների արդյունքների համաձայն՝ դեկտեմբերի 10-ից Էկոնոմիկայի նախարարության, բնապահպանության եւ բնական պաշարների նախարարության, Էկոնոմիկայի նախարարությանն առընթեր գույքային հարցերի պետական ծառայության եւ AzerGold ՓԲԸ-ի մասնագետների խումբը սկսում է նախնական մոնիթորինգ՝ կապված օգտակար հանածոների հանքավայրերի շահագործման, ինչպես նաեւ դրա բնապահպանական եւ այլ հետեւանքների հետ՝ Ադրբեջանի տարածքում, որտեղ ժամանակավորապես տեղակայված է ռուսական խաղաղապահ զորախումբը»,- ասվում է հաղորդագրության մեջ։

Նշվում է, որ աշխատանքների ընթացքում նախատեսվում է «ստուգել» օգտակար հանածոների հանքավայրերը, մասնավորապես՝ Դրմբոնի ոսկու հանքավայրը եւ Քաշենիի պղնձամոլիբդենային հանքավայրը, մոնիթորինգ անցկացնել տարբեր ուղղություններով, կազմակերպել գույքի կադաստրային հաշվառում, գնահատել հնարավոր վնասներն ու ռիսկերը շրջակա միջավայրի, ստորգետնյա եւ մակերեւութային ջրերի աղբյուրների համար: