Սերը սեր է. Բայդենը ստորագրել է միասեռ ամուսնությունների ճանաչման օրենքը

ԱՄՆ նախագահ Ջո Բայդենը հազարավոր կողմնակիցների ներկայությամբ ստորագրել է Respect for Marriage Act-ը, որը ճանաչում է միասեռ ամուսնությունները դաշնային մակարդակով, հայտնում է Reuters-ը։

«Ամուսնությունը պարզ առաջարկ է. Ո՞ւմ ես սիրում։ Իսկ դու հավատարիմ կլինե՞ս այն մարդուն, ում սիրում ես։ Դրանից ավելի հեշտ բան չկա: Օրենքն ընդունում է, որ յուրաքանչյուր ոք պետք է իրավունք ունենա իր համար պատասխանելու այս հարցերին»,- ասել է Բայդենը։

Ստորագրումից առաջ դիմելով ամբոխին՝ Ներկայացուցիչների պալատի խոսնակ Նենսի Փելոսին ասել է, որ օրինագիծը նպաստում է հավասարությանը:

Ամուսնության հարգման մասին օրենքը մշակվել է դեմոկրատների կողմից՝ կանխելու պահպանողական Գերագույն դատարանի դատավորների կողմից միասեռ ամուսնությունների իրավունքի հնարավոր չեղարկումը: Նոյեմբերի վերջին այս օրենքը հաստատվել է Սենատի, դեկտեմբերին՝ Ներկայացուցիչների պալատի կողմից։

Նախագահ Ջո Բայդենն ավելի վաղ ազդարարել էր, որ եթե օրինագիծը հաստատվի Ներկայացուցիչների պալատի կողմից, ինքը կստորագրի այն։ «Սերը սեր է, և ամերիկացիները պետք է իրավունք ունենան ամուսնանալու այն մարդու հետ, ում սիրում են», - ասել է ԱՄՆ նախագահը: