ԱԺ-ում ՄԱԿ ԱԽ-ին և ԵԱՀԿ Մինսկի խմբին կոչ արեցին փաստահավաք առաքելություն ուղարկել Լեռնային Ղարաբաղ

Ազգային ժողովի «Քաղաքացիական պայմանագիր» խմբակցության պատգամավոր Հռիփսիմե Գրիգորյանը ՄԱԿ-ի անվտանգության խորհրդի անդամներին, ԵԱՀԿ Մինսկի խմբի համանախագահ և անդամ պետություններին կոչ արեց մոնիթորինգ իրականացնելու նպատակով փաստահավաք առաքելություն ուղարկել Լեռնային Ղարաբաղ:

Գրիգորյանը նշեց, որ ապացուցման կարիք չունի այն փաստը, որ Լաչինի միջանցքի հերթական, այս անգամ՝ օրեր ձգվող արգելափակմամբ, Ադրբեջանն ուղղակիորեն խախտել է 2020 թվականի նոյեմբերի 9-ի եռակողմ հայտարարության իր պարտավորությունը:

«Ադրբեջանի Հանրապետությունը երաշխավորում է Լաչինի միջանցքով քաղաքացիների, տրանսպորտային միջոցների և բեռների երկու ուղղություններով տեղաշարժի անվտանգությունը: Նույնկերպ ապացուցման կարիք չունի այն փաստը, որ, արգելափակելով Լեռնային Ղարաբաղի կյանքի միակ ճանապարհ հանդիսացող միջանցքը, Ադրբեջանը շրջափակման մեջ է առել շուրջ 120 հազար մարդկանց, այդ թվում՝ կանանց և երեխաների՝ իրավիճակը հասցնելով հումանիտար ճգնաժամի եզրին: Նախօրեին, ձմռան պայմաններում փակելով գազի մատակարարման փականը և առանց ջեռուցման թողնելով Լեռնային Ղարաբաղի բնակչությանը, Ադրբեջանը միտումնավոր սրում է իրավիճակը:

Այս պայմաններում արձանագրում ենք, որ Ռուսաստանի Դաշնության խաղաղապահ առաքելությունը պետք է վերականգնի վերահսկողությունը Լաչինի միջանցքում, ընդ որում՝ անհապաղ և բոլոր միջոցներով:

ՄԱԿ-ի անվտանգության խորհրդի անդամներին, ԵԱՀԿ Մինսկի խմբի համանախագահ և անդամ պետություններին կոչ ենք անում մոնիթորինգ իրականացնելու նպատակով փաստահավաք առաքելություն ուղարկել Լեռնային Ղարաբաղ: Համարում ենք, որ փաստահավաք առաքելությունը պետք է նպատակ ունենա ոչ միայն հավաքագրել տեղեկատվություն, այլ նաև ազդանշան հանդիսանա առ այն, որ իրավիճակը սպառնալից է և պայթյունավտանգ: Փաստահավաք առաքելությունը պետք է լինի ժամանակին և հրատապ, քանի որ դրանից  ուղղակիորեն կարող են պայմանավորված լինել մարդակային կյանքներ»,- ընդգծեց պատգամավորը:

Պատգամավորը նաև միասնականության կոչ արեց Հայաստանի ներսում և Հայաստանից դուրս քաղաքական և քաղաքացիական բոլոր միավորներին ՝ ի շահ Լեռնային Ղարաբաղի ժողովրդի անվտանգության: