Քենիան կոչ է արել ապահովել տեղաշարժի ազատությունն ու անվտանգությունը Լաչինի միջանցքի երկայնքով

Քենիան խորապես մտահոգված է այն տեղեկություններով, որոնք ստացվել են Լաչինի միջանցքի արգելափակման շարունակման վերաբերյալ։ Քենիան երկու կողմերին կոչ է անում նվազեցնել առկա լարվածությունը և համագործակցել՝ ապահովելու համար միջանցքի երկայնքով տեղաշարժի ազատությունը և անվտանգությունը՝ նախկինում ձեռք բերված համաձայնություններին համապատասխան, այս մասին հայտարարել է Քենիայի ներկայացուցիչը ՄԱԿ-ի ԱԽ նիստում, որի ընթացքում քննարկվում էր իրավիճակը Լաչինի միջանցքում։

Դիվանագետը նշել է, որ որևէ հակամարտություն չի կարող ունենալ ռազմական լուծում, սակայն վեճերի խաղաղ լուծման համար առկա գործիքների կիրառությունը, ՄԱԿ-ի կանոնադրությամբ նախատեսված գործիքների կիրառությունը, այդ թվում՝ խորհրդակցությունները և բանակցությունները, լավագույն հնարավորությունն են ընձեռում տևական և կայուն արդյունքի հասնելու համար։ Ուստի մենք կոչ ենք անում շահագրգիռ կողմերին շարունակել աշխատել երկու կողմերի հետ՝ գտնելու հակամարտության համապարփակ և տևական լուծում և կարգավորելու հարաբերությունները՝ հիմնվելով երկու կողմերի ինքնիշխանության և տարածքային ամբողջականության փոխադարձ ճանաչման և հարգման սկզբունքների վրա՝ իրենց սահմաններով», - ասել է Քենիայի ներկայացուցիչը։

«Այդպիսի համագործակցությունն իր հերթին կբերի շոշափելի արդյունքներ, որոնք շահեկան կլինեն երկու երկրների համար», - եզրափակել է Քենիայի ներկայացուցիչը։