Հիմա ՄԱԿ-ի ԱԽ-ում քննարկվում է մամուլի հաղորդագրության տեքստը. ԼՂ հիմնախնդիրը կրկին միջազգայնանում է. Ռուբինյան

Շատ դրական եմ գնահատում ՄԱԿ-ի Անվտանգության խորհրդի նիստը, շատ հաջող նիստ էր եւ ըստ էության, բոլոր երկրների ներկայացուցիչները ֆիքսեցին, որ Լաչինի միջանցքի ապօրինի շրջափակումը պետք է դադարի եւ կոչ արեցին Ադրբեջանին հավատարիմ մնալ նոյեմբերի  9-ի հայտարարության այն դրույթին, ըստ որի Լաչինի միջանցքը պետք է ապահովի անխափան կապ Հայաստանի եւ Արցախի միջեւ: Այս մասին այսօր՝ դեկտեմբերի 21-ին, ԱԺ-ում լրագրողների հետ զրույցում նշեց ԱԺ փոխնախագահ Ռուբեն Ռուբինյանը:

«Դուք գիտեք, որ երեկ նիստի սկզբում ներկայացվեց, որ կա մամուլի հաղորդագրության նախագիծ, որը պետք է քննարկվեր: Իմ  տեղեկություններով այն հիմա քննարկման փուլում է, կտեսնենք՝ ինչ արդյունքներ կլինեն: Դա մի տեքստ է, որը կարող է լինել միայն կոնսենսուսով»,-ասաց նա:

Ինչ վերաբերում է Ադրբեջանի հայտարարությանը, թե իրենք չեն փակել միջանցքը, երրորդ երկրներն են շահագրգռված դրանում, ում նկատի ունի Բաքուն, Ռուբինյանն ասաց. «Նկատի ունի Ռուսաստանին: Դա ադրբեջանական  կեղծ պրոպագանդիստական թեզ է, որը նրանք օգտագործում են տարբեր հարթակներում: Այս անգամ դա ՄԱԿ-ի Ախ-ում ասվեց, դրա համար երեւի ուղիղ չասացին, որ Ռուսաստանին են մեղադրում: Ուրիշ հարթակներում նրանք բացեիբաց դա ասում են, ինչը, բնականաբար, չի համապատասխանում իրականությանը: Լաչինի միջանցքը ապօրինաբար արգելափակել են ադրբեջանցիները եւ Ադրբեջանը»:

Ռուբինյանը ճիշտ չհամարեց 44-օրյա պատերազմի ժամանակ միջազգային հանրության հնչեցրած կոչերը համեմատել վերջին օրերին միջազգային հանրության կոչերի հետ. «Այս համատեքստում եւ նաեւ սեպտեմբերին Հայաստանի դեմ ուղղված ագրեսիայի համատեքստում այդ կոչերը շատ ավելի հստակ են, հասցեական են եւ շատ ավելի կոշտ են: Մենք պետք է փորձենք միջազգային ճնշումը Ադրբեջանի վրա հնարավորինս մեծացնել: Ես կարծում եմ՝ երեկվա նիստից ակնհայտ դարձավ, որ այդ ճնշումն իրապես մեծացել է եւ մեծանում է, որովհետեւ Լեռնային Ղարաբաղի խնդիրը կրկին միջազգայանանում է: Դա Ադրբեջանի ապօրինի քայլերի արդյունքն է: Դուք տեսաք, որ բոլոր  երկրների ներկայացուցիչներն օգտագործում են Լեռնային Ղարաբաղ անվանումը՝ ի հեճուկս Ադրբեջանի պնդումների, բոլորը ֆիքսում էին մոյեմբերի 9-ի հայտարարության կարեւորությունը եւ դրա մեջ պարփակված պայմանավորվածությունները պահելու կարեւորությունը, Լաչինի միջանցքը եւ դրա կարգավիճակը: Պետք է մեծացնել ճնշումը»,-ասաց Ռուբեն Ռուբինյանը:

Հիշեցնենք, որ ադրբեջանցի «բնապահպանները» դեկտեմբերի 12-ից փակել են  ճանապարհը: Սկզբում նրանք հայտարարում էին, որ ռուս խաղաղապահների պատասխանատվության գոտում գտնվող հանքավայրերի շահագործումն «ապօրինի է» և որ իրենց համապատասխան «մասնագետներին» պետք է թույլ տրվի այցելել շահագործման վայրեր և մշտադիտարկում անցկացնել: Սակայն այժմ նրանք պահանջում են Լաչինի միջանցքում ադրբեջանական մաքսակետ տեղադրել: