Սերբիայի նախագահը շնորհակալություն է հայտնել Ալիևին՝ իրեն «առաջիկա իրադարձությունների մասին» հայտնելու համար

Մենք քննարկել ենք համագործակցության բոլոր ձևերը։ Մեզ կապում է ամուր և անկեղծ ընկերությունը։ Չի կարելի Ադրբեջանին տրամադրել Սերբիայի դեմ, իսկ Սերբիան՝ Ադրբեջանի։ Դա անհնար է անել: Ոչ ոք դա անելու կարողություն չունի, և նրանց վրա ճնշում չկա դա անելու համար:

Այս մասին Սերբիայի նախագահ Ալեքսանդր Վուչիչն ասել է Ադրբեջանի նախագահ Իլհամ Ալիևի հետ ​​հանդիպումից հետո, հայտնում է ԱՊԱ-ն։

«Մենք աջակցում ենք միմյանց տարածքային ամբողջականությանը։ Այդպես եղել է և կլինի։ Ես շնորհակալ եմ նախագահ Ալիևին, քանի որ նա հստակ գիտի, թե ինչ դժվարությունների ենք հանդիպում մեր երկրի տարածքում կարգուկանոն պահպանելու և ՄԱԿ-ի կանոնադրության պահանջները պաշտպանելու հարցում։ Ես նաև երախտապարտ եմ նրան, որ շատ բան իմացա նրանից, այդ թվում՝ առաջիկա իրադարձությունների մասին։ Որովհետև ես կարող եմ ավելի իրատեսորեն, ավելի լուրջ տեսնել, թե ինչ է մեզ սպասվում ապագայում»,- հավելել է Սերբիայի նախագահը։

Նշենք, որ Սերբիան և Ադրբեջանը մտադիր են խորացնել ռազմական և էներգետիկ համագործակցությունը։ Վուչիչը հայտնել է, որ Բելգրադը հետաքրքրված է Ադրբեջանի, Վրաստանի և Ռումինիայի նոր էներգետիկ նախագծով։