Հեղափոխությունից հետո կոռուպցիոն հանցագործությունների մեջ մեղադրված պաշտոնյաների 10-յակը

Կար ժամանակ, երբ Նիկոլ Փաշինյանը հպարտանում էր, թե Հայաստանում վերացրել է համակարգային կոռուպցիան։ Հիմա այդ մասին այլևս նախկին էնտուզիազմով չեն խոսում։ Համակարգային կոռուպցիան իբր վերացել է, բայց ամեն շաբաթ կոռուպցիայի դեպքեր են բացահայտվում, նախարարներ ու այլ բարձրաստիճան պաշտոնյաներ են ձերբակալվում։ Ձեր ուշադրությանն ենք ներկայացնում այն պաշտոնյաներին, որոնց հեղափոխությունից հետո կոռուպցիոն բնույթի հանցագործություններ կատարելու մեջ մեղադրանքներ են ներկայացվել:

Նմանատիպ քրեական գործով է անցնում ՊՆ նախկին նախարար Դավիթ Տոնոյանին: Պաշտոնանկությունից շուրջ մեկ տարի անց ԱԱԾ-ն նրան մեղադրանք առաջադրեց ու կալանավորեց։ Տոնոյանը մեղադրվում է շուրջ 4.7 միլիոն դոլարի չարաշահման համար, նրան վերագրվում է կոռուպցիոն հանցագործություն․ խոսքը ռազմամթերքի ձեռքբերման մասին է։

Ամիսներ առաջ հայտնի դարձավ, որ ԱԱԾ-ն է մտել Քննչական կոմիտե եւ ՀԿԳ  քննիչին հենց իր աշխատասենյակից տարել է: Իսկ ո՞վ է ԱԱԾ-ի կողմից կալանավորված հատկապես կարեւոր գործերով քննիչը: Վերջինս Վլադիմիր Ասատրյանն է, որը Քննչական կոմիտեում աշխատել է 2017 թվականից եւ զբաղեցրել է տարբեր պաշտոններ, նա 60.900 դոլար կաշառքի գործով  ձերբակալվել է:

Քաղաքաշինության կոմիտեի նախկին նախագահ Վահագն Վերմիշյանին մեղադրանք է առաջադրվել առանձնապես խոշոր չափի կաշառք ստանալու համար։ ԱԱԾ–ն փաստական տվյալներ է ստացել, որ կոմիտեի նախագահը,  պաշտոնեական դիրքը ծառայության շահերին հակառակ օգտագործելով և անձնական շահագրգռվածությունից ելնելով, շինարակական աշխատանքներ ծավալող անձանց կամ կառուցապատող ընկերությունների ներկայացուցիչների հետ ձեռք բերված պայմանավորվածությունների համաձայն, ինչպես անձամբ, այնպես էլ մտերիմի միջոցով 5 դեպքով խոշոր և առանձնապես խոշոր՝ 1.000.000-2.500.000 ՀՀ դրամի չափով, գումարի կամ ապրանքանյութական արժեքների տեսքով կաշառք ստանալու դիմաց, 2019թ. ընթացքում նրանց օգտին կատարել է գործողություններ կամ նպաստել է ցանկալի որոշումների արագ կայացմանը և տրամադրմանը

ՀՀ հակակոռուպցիոն կոմիտեում քննված բազմադրվագ քրեական վարույթով կատարված նախաքննության ընթացքում ձեռք բերված բավարար ապացույցների համակցությամբ բացահայտվել են  ՀՀ արտակարգ իրավիճակների նախարարության պաշտոնատար և այլ անձանց կողմից 2021-2022 թվականների ընթացքում խոշոր չափերով կաշառք տալու, ստանալու, կաշառք ստանալուն օժանդակելու, ապօրինի վարձատրություն ստանալու և տալու դեպքեր, որոնցում ներգրավված են եղել Արտակարգ իրավիճակների նախարար Անդրանիկ Փիլոյանը և ԱԻ նախարարության աշխատակիցներ, այդ թվում`  տարբեր ստորաբաժանումների ղեկավարներ և այլ անձինք: Ըստ պաշտոնական տեղեկությունների ՝ ԱԻ նախարար Փիլոյանը իր խորհրդական Ա. Հ.-ի օժանդակությամբ 2022 թ.-ինստացել է խոշոր չափերով` 1000000 ՀՀ դրամ կաշառք:

2018-ի հոկտեմբերից  սպորտի նախարարի տեղակալի պաշտոնը զբաղեցրած Գևորգ Լոռեցյանը մեղադրվում է «Լուառ» և «Էլիտ Սպորտ» առևտրային կազմակերպությունների սեփականատեր և գործադիր տնօրեն Հրաչիկ Քանանյանից 2 մլն դրամ կաշառք պահանջելու մեջ։ Փոխնախարար Լոռեցյանին սպասարկող վարորդ Էդուարդ Հովհաննիսյանը մեղադրվում է Լոռեցյանին օժանդակելու, իսկ Հրաչիկ Քանանյանը՝ կաշառք տալու մեջ։

Ամիսներ առաջ էլ պարզվել են  Իջևանի համայնքապետարանում  հեղափոխությունից հետո կատարված առերևույթ չարաշահումների դեպքի մի շարք հանգամանքներ: Մեղադրանք է առաջադրվել համայնքի նախկին ղեկավար Վարդան Ղալումյանին, ով հեղափոխությունից հետո մնաց իր պաշտոնում և շարունակեց աշխատել նոր իշխանությունների հետ: Ձեռք բերված բավարար ապացույցների համակցությամբ՝ Իջևան համայնքի ղեկավարին մեղադրանք է առաջադրվել՝ ՀՀ քրեական օրենսգրքի 308-րդ հոդվածի 1-ին մասով, այն է` պաշտոնեական լիազորությունները չարաշահելը և կոռուպցիոն բնույթի գործողությունները:

ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում շարունակվում է Երևան քաղաքի Նորք-Մարաշ վարչական շրջանի ղեկավարի արդեն նախկին տեղակալ Ջանիբեկ Վարդանյանի կողմից առերևույթ խարդախության փորձ կատարելու, 4000 ԱՄՆ դոլարի կաշառք ստանալու դեպքի առթիվ հարուցված քրեական գործի նախաքննությունը:

Առողջապահության ՔՊ-ական փոխնախարարին նույնպես նույն ճակատագիրն էր սպասվում: Արսեն Դավթյանը մեղադրվում է առանձնապես խոշոր չափով՝3000 ԱՄՆ դոլարի համարժեք դրամով կաշառք ստանալու մեջ, նա կալանավորվել է 7 տարով: 

Քննչական կոմիտեի զինվորական քննչական գլխավոր վարչության ՀԿԳ քննության վարչության վարույթում քննվող քրեական գործով մեղադրանքներ են առաջադրվել ՀՀ ՊՆ վերահսկիչ վարչության ընդհանուր վերահսկման բաժնի պետ, գնդապետ Սամվել Խաչատրյանին` առանձնապես խոշոր չափերով կաշառք ստանալու և ՀՀ ՊՆ ՆՏԱ դեպարտամենտի տեխնիկական ապահովման վարչության գլխավոր մասնագետ Արսեն Ղարիբջանյանին՝ առանձնապես խոշոր չափերով կաշառք ստանալուն օժանդակելու համար:

Աջափնյակ վարչական շրջանի նախկին ղեկավար Գևորգ Բաբայանը, որը մեղադրվում է կոռուպցիոն հանցագործություն կատարելու համար, նշանակվել է Տարածքային կառավարման և ենթակառուցվածքների նախարարության պետական գույքի կառավարման կոմիտեի նախագահի տեղակալ: 2020 թ. մայիսին Քննչական կոմիտեն հայտնել էր, որ Երևան քաղաքի Աջափնյակ վարչական շրջանի նախկին ղեկավարն առերևույթ չարաշահել է պաշտոնեական լիազորությունները: Մասնավորապես, ըստ ՔԿ հաղորդագրության, Բաբայանը վ/շ համապատասխան աշխատակցի հայտնաբերած և իրեն ներկայացված՝ Նազարբեկյան փողոցում ինքնակամ շինություններ կառուցելու վերաբերյալ տվյալները չի ուղարկել Երևանի քաղաքապետարան, ինչպես նաև արգելել է կազմել համապատասխան արձանագրություններ։