Ռուսաստանը հույս ունի Հայաստանի հետ ապրանքաշրջանառության ռեկորդային` 14-16 մլրդ դոլարի ցուցանիշի հասնել. ՀՀ-ում ՌԴ դեսպան

Ռուսաստանն ակնկալում է մինչև տարեվերջ Հայաստանի հետ ապրանքաշրջանառության ռեկորդային` 14-16 մլրդ դոլարի ցուցանիշի հասնել։ Այս մասին ասել է Հայաստանում ՌԴ դեսպան Սերգեյ Կոպիրկինը «Իզվեստիային» տված հարցազրույցում։

«Եթե խոսենք կոնկրետ թվերի մասին, ապա արդեն 2024թ. առաջին կիսամյակում ապրանքաշրջանառությունը Ռուսաստանի եւ Հայաստանի միջեւ գերազանցել է 8,3 մլրդ դոլարը՝ անցած տարվա 7,4 մլրդ դոլարի փոխարեն։ Ակնկալում ենք պահպանել տեմպերը եւ դուրս գալ ռեկորդային՝ 14-16 մլրդ դոլարի մակարդակի»,- ասել է Կոպիրկինը։

Դեսպանն ընդգծել է, որ այժմ աշխատանքներ են տարվում Հայաստանում համատեղ տնտեսական նախագծերի մեկնարկի ուղղությամբ։ Նախատեսվում է, որ նրանք շոշափելի ներդրում կունենան հանրապետության արդյունաբերության զարգացման, նոր աշխատատեղերի ստեղծման և բյուջեի հարկային մուտքերի ավելացման գործում։