Ուր են և ինչու են լռում Հայաստանի խոշոր գործարարներն ու պաշտոնյաները. Արմեն Հակոբջանյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական կարևորագույն պաշտոններ, հարստություն և բիզնես են դիզել՝ Հայաստանի և Արցախի անունը հոլովելով, իսկ այսօր, երբ Արցախում տեղի է ունենում անթաքույց ցեղասպանություն, լռում են և նախընտրում են մնալ ստվերում:

Այսօր կանդրադառնանք Սիսիանի համայնքապետ Արմեն Հակոբջանյանին: Նկատենք, որ Արմեն Հակոբջանյանը Սիսիանի նախկին քաղաքապետ Աղասի Հակոբջանյանի եղբորորդին է: Ասել է թե՝ Նիկոլ Փաշինյանը նախկինում քրեական գործերի մեջ թաթախված Սիսիանի նախկին քաղաքապետ Աղասի Հակոբջանյանի եղբորորդուն է նշանակում համայնքի ղեկավարի ժամանակավոր պաշտոնակատար: Իսկ ի՞նչ էր արել նախկին քաղաքապետը: 2012թ. Սյունիքի մարզպետարանը Սիսիանի քաղաքապետարանում իրականացրած վարչական հսկողության արդյունքում բացահայտել էր մի շարք խախտումներ: Դրանց հիմքով՝ ՀՀ քրեական օրենսգրքի 308 հոդվածի 1-ին մասով (պաշտոնեական լիազորությունների չարաշահում)՝ քրեական գործ էր հարուցվել այն ժամանակվա համայնքի ղեկավարի տեղակալ Աշոտ Գրիգորյանի նկատմամբ, եւ վերջինս ազատազրկվել էր երեք տարի ժամկետով: Նրա նկատմամբ կիրառվել է Հայաստանի Հանրապետության անկախության հռչակման 20-րդ տարեդարձի կապակցությամբ հայտարարված համաներումը, եւ համայնքի ղեկավարի նախկին տեղակալն ազատվել է պատիժը կրելուց: Անփոփոխ է մնացել, որպես հանցագործությամբ պատճառված գույքային վնասի փոխհատուցում, Աշոտ Գրիգորյանից հօգուտ տուժողի 11 մլն 250 հազար դրամ բռնագանձման մասին դատարանի որոշումը: Սույն գործում որպես մեղադրյալներ ներգրավված են նաեւ Սիսիանի քաղաքապետ Աղասի Հակոբջանյանը, քաղաքապետարանի աշխատակազմի ֆինանսատնտեսական բաժնի պետ Կարեն Դանիելյանը եւ համայնքի ղեկավարի նախկին տեղակալ Աշոտ Գրիգորյանը: Ընդ որում, ըստ նախաքննության, վերջիններիս արարքը գնահատելիս նշվում է, որ պատշաճ չեն կատարվել ծառայողական պարտականությունները, որի արդյունքում համայնքին անզգուշությամբ պատճառվել է էական գույքային վնաս, իսկ «Սիսիանի լրատու» ՍՊԸ-ի աշխատակիցների դեմ քրեական գործը հարուցված է այն հիմքով, որ կեղծվել է իրավունք վերապահող պաշտոնեական փաստաթուղթ, եւ այն օգտագործելով՝ խարդախությամբ հափշտակվել է խոշոր չափի` 1 մլն 260 հազար դրամ գումար:

44-օրյա պատերազմից հետո Հակոբջանյանը փորձում էր իրեն ներկայացնել հայրենասեր և սրտացավ ղեկավարի ամպլուայում: Սիսիան համայնքն այդ պատերազմում 78 զոհ է տվել, որից 64-ը հուղարկավորված է Սիսիանի պանթեոնում: Համայնքապետը բյուջեից գումար էր հատկացրել հուղարկավորված զինվորների շիրիմների բարեկարգման համար: Հայտարարում էր, որ արցախցիների է ընդունել իր համայնքում, նրանց սրտացավ ընդունել է և պատրաստ է ամեն հարցում օժանդակել, չմոռանալով շեշտել, որ բյուջեով այդ նպատակի համար գումար հատկացված չէ:

Այսօր, երբ մարզը դարձել է սահմանամերձ, իսկ էթնիկ զտման ենթարկված արցախցիների մեծ մասը տեղավորվել է հենց Սյունիքում՝ Սիսիանի համայնքապետը ոչինչ չունի՞ ասելու, առնվազն՝ քաղաքացիական դիրքորոշում հայտնելու մասով: Ի վերջո իր քաղաքական թիմի ձախողումների արդյունքում վտանգը հասել է Սյունիքի դուռը: Ժամանակին իրեն հայրենասեր ներկայացնող համայնքապետն այսօր զբաղված է ՔՊ համար վիզ դրած աշխատելով՝ չնկատելու տալով այն ռիսկերը, որ այսօր սպառնում են Սյունիքին և նաև՝ իր ղեկավարած համայնքին: Ինչպես ասում են՝ պաշտոնը քաղցր բան է...

Շարունակելի...