Ուր են և ինչու են լռում Հայաստանի խոշոր գործարարներն ու պաշտոնյաները. Մնացական Սաֆարյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական և ռազմական պաշտոններ, Արցախի և Հայաստանի անունը հոլովելով բիզնես են դիզել, իսկ այսօր, երբ Արցախը գրեթե կորսված է, իսկ Հայաստանը գտնվում է լրջագույն վտանգների առջև, նրանք նախընտրում են լռել, ասես ոչինչ էլ տեղի չի ունեցել:

Այսօր կանդրադառնանք ԱԳՆ փոխնախարար Մնացական Սաֆարյանին, ով երկար տարիներ շարունակ բարձր դիվանագիտական պաշտոններ է զբաղեցրել. 1997-1998թթ.` ԱԳՆ Ասիայի, Օվկիանիայի և Աֆրիկայի վարչություն, կցորդ, 1998 – 2001թթ.` Չինաստանում ՀՀ դեսպանություն, կցորդ, 2001 – 2003թթ.` ԱԳՆ Ասիայի, Օվկիանիայի և Աֆրիկայի վարչություն, երրորդ քարտուղար, 2005 – 2009թթ.` ԱԳՆ Ասիայի, Օվկիանիայի և Աֆրիկայի վարչություն, երկրորդ քարտուղար, բաժնի վարիչի պաշտոնակատար, 2009 – 2012թթ.` Չինաստանում ՀՀ դեսպանություն, առաջին քարտուղար, հյուպատոս, 2012 – 2015թթ.` ԱԳՆ Ասիայի, Օվկիանիայի և Աֆրիկայի վարչություն, առաջին քարտուղար, խորհրդական, բաժնի վարիչի պաշտոնակատար, 2015 – 2018թթ.` Բելգիայում ՀՀ դեսպանություն, ԵՄ-ում ՀՀ առաքելություն, խորհրդական, 2018 – 2021թթ.` ԱԳՆ Հյուսիսարևելյան Ասիայի բաժնի վարիչ, 2021 – 2022թթ.` ԱԳՆ Ասիայի և խաղաղօվկիանոսյան երկրների վարչության պետ: 2022թ․ հունվարի 26-ին ՀՀ վարչապետի որոշմամբ նշանակվել է ՀՀ արտաքին գործերի նախարարի տեղակալ:

Ընդամենը մեկ տարի առաջ Սաֆարյանը հայտարարում էր՝ «Հայաստանը հայտարարել է խաղաղ օրակարգի՝ տարածաշրջանում հաստատման և այս ուղով ընթանալու վերաբերյալ: Վարվում են բանակցություններ, և մենք այս բանակցություններում նպատակ ունենք ապահովելու Լեռնային Ղարաբաղի բնակչության իրավունքներն ու անվտանգությունը»: ինչպես տեսնում ենք՝ չստացվեց և վարած բանակցությունների արդյունքում Արցախն այսօր հայաթափվել է, արցախցիներն էլ ենթարկվել են էթնիկ զտման: 

Նույն Սաֆարյանը, ով, ըստ իր խոսքերի, անմնացորդ բանակցում էր Արցախի բնակչության իրավունքների և անվտանգության ապահովման համար, այնուհետև լրագրողներից պահանջում էր չպարտադրել իրեն այո կամ ոչ ասել՝ Արցախը կլինի՞ արդյոք Ադրբեջանի կազմում հարցին:

Մյուս կողմից էլ նույն Սաֆարյանը ժամանակին չէր խորշում իր կոստյումի վրա ամրացնել Արցախի Հանրապետության դրոշը։

Անշուշտ, հարց է առաջանում՝ իսկ այսքան տապալումներից և փաստացի Արցախի կորստից հետո երկար տարիներ իրեն Հայաստանին և Հայաստանի շահերի պաշտպանելուն միտված դիվանագիտական գործունեությանը նվիրած Սաֆարյանը ոչինչ չունի ասելո՞ւ որպես փորձառու դիվանագետ և մարդ, ով, ըստ էության, երկար տարիներ աշխատել է պաշտպանելու Հայաստանի և Արցախի շահերը: Ի՞նչն է փոխվել Սաֆարյանի մոտ, բացի, անշուշտ, պաշտոնից...

Շարունակելի...