ՊՈԱԿ-ների սկանդալային հայտնիություն ունեցող պետերն ու նրանց ունեցվածքը

Հայաստանյան մի շարք ՊՈԱԿ-ներ հեղափոխությունից հետո համալրվեցին իշխանության վերին էշելոնի ներկայացուցիչների յուրայիններով և ազգականներով: Այսօր՝ հեղափոխությունից չորս տարի անց, ունենք մի իրավիճակ, երբ վերը նշված ՊՈԱԿ-ները պարբերաբար հայտնվում են հանրության ուշադրության կենտրոնում, իսկ նրանց ղեկավարները՝ տարբեր կոռուպցիոն և այլ տիպի, ոչ պակաս պիկանտ սկանդալների հերոսներ դառնում:

Դիցուք՝  Սեւան ազգային պարկ ՊՈԱԿ-ում, ըստ մամուլի մի շարք հրապարակումների, անկազմակերպ եւ անկառավարելի վիճակ է: ՊՈԱԿ-ում տիրող իրավիճակը լրագրողներին են ներկայացրել պարկի ճակատագրով հետաքրքրվող մի շարք քաղաքացիներ: Նրանց խոսքերով՝ ՊՈԱԿ-ի ԺՊ Արման Աբելյանն (նա այս պաշտոնին նշանակվել է 2021-ի մարտին) ընդհանրապես չի տիրապետում իրավիճակին: Բացի այս, պարկի պահպանությունն ըստ պատշաճի չի իրականացվում, ձկնորսն ինչ ուզում՝ անում է, արագ արձագանքման համար ստեղծված ինչ-որ խմբեր կան, որոնք ոչինչ չեն անում որսագողությունը կանխելու համար: Կարճ ասած, ՊՈԱԿ-ի տնօրենի Ժամանակավոր պաշտոնակատար նշանակված Արման Աբելյանը անգործության է մատնված: Բացի այս, հայտնի է դարձել նաեւ, որ ՊՈԱԿ-ը հասցրել է ֆինանսական պարտքեր կուտակել ոչ պրոֆեսիոնալ կառավարման հետեւանքով: Նույն լրատվամիջոցի փոխանցմամբ՝ Արման Աբելյանը շրջակա միավայրի նախկին նախարար, Պետական վերահսկողական ծառայության ներկայիս ղեկավար Ռոմանոս Պետրոսյանի ուսանողական ընկերն է, որի կարիերայի համար Պետրոսյանն անում է ամեն հնարավորը:

«Հայանտառ»-ի Սիսիանի մասնաճյուղի տնօրեն, «Քաղաքացիական պայմանագիր» խմբակցության պատգամավոր Կարեն Համբարձումյանի եղբայր Տիգրան Համբարձումյանը շաբաթներ առաջ վիրավորական, հայհոյախառն արտահայտություններ էր գրել Ֆեյսբուքի օգտատեր, Մոսկվայից Հայաստան եկած բլոգեր Մերի Տոմոյանի ուղիղ եթերի ժամանակ: Եվ գրելիս այն կարգի էր ազարտի մեջ ընկել, որ վիրավորել ու հայհոյել էր նաեւ զոհվածների հարազատներին։

2021 թվականի հոկտեմբերի 15-ից Կրթության, գիտության, մշակույթի և սպորտի նախարարության ենթակայությամբ գործող «Պատմամշակութային արգելոց-թանգարանների և պատմական միջավայրի պահպանության ծառայություն»  ՊՈԱԿ-ի տնօրենի պարտականությունները կատարում է Արմեն Հովհաննիսյանը, որը մինչ այդ զբաղեցնում էր տնօրենի տեղակալի պաշտոնը:  Արմեն Հովհաննիսյանը ՊՈԱԿ-ի ղեկավար է նշանակվել ԿԳՄՍ նախկին նախարար Արայիկ Հարությունյանի օգնական (նաև սանիկ), այժմ «Քաղաքացիական պայմանագիր» խմբակցության պատգամավոր Դավիթ Դանիելյանի երաշխավորությամբ։ Արմեն Հովհաննիսյանն ու Դավիթ Դանիելյանը ընկերներ են։ Հովհաննիսյանն արդեն իսկ հասցրել է հայտնվել պիկանտ պատմությունների կիզակետում:

Բացի այդ, ՊՈԱԿ-ի ղեկավարները նաև բավական լուրջ եկամուտներ են դիզել: Դիցուք՝ Գյումրու վագանու անդամ Շավարշ Արամյանը, մամուլի տեղեկություններով, հանդիսանում է Շիրակի նախկին մարզպետ Կարեն Սարուխանյանի ազգականը: Սեյսմիկ ծառայության Շիրակի մարզային ծառայության տնօրենին հեղափոխությունից հետո շուրջ 3 տարի պարտադրում էին թողնել պաշտոնը: Ավելին՝ Կարեն Սարուխանյանն այդ պաշտոնի հավակնորդ հերթական բարեկամն ուներ, ում համար փոխտնօրենի հաստիք էին ստեղծել ու նշանակել այդ պաշտոնում՝ տնօրեն նշանակելու գործընթացն առավել դյուրին իրականացնելու համար: «Սեյսմիկ պաշտպանության հյուսիսային ծառայություն» ՊՈԱԿ-ի տնօրենի հավակնորդը հենց Արամյանն էր, ով ֆեյսբուքյան իր էջում, ի դեպ, արդեն գրառում է կատարել այն մասին, որ 2021թ. օգոստոսից սկսել է աշխատել Սեյսմիկ պաշտպանության տարածքային ծառայությունում: 2021թ. հոկտեմբերից վերջինս, ամեն դեպքում, նշանակվեց ՊՈԱԿ-ի հյուսիսային տարածաշրջանային կենտրոնի պետ։ Նա հայտարարագրել է հողամաս, GAZ մակնիշի ավտոմեքենա,1,300,000.00 կանխիկ դրամ, 2,080,000.00 ՀՀ դրամի եկամուտ:

Տարոն Չախոյանը, ով ընդամենը ամիսներ առաջ զբաղեցնում էր Հասարակական կապերի և տեղեկատվությա կենտրոն» ՊՈԱԿ-ի տնօրենի պաշտոնը, հայտարարագրել է բնակարան, 2019-ին ձեռք բերված MERCEDES-BENZ մակնիշի ավտոմեքենա,  4,000,000.00 դրամի բանկային ավանդ, բանկային հաշիվների մնացորդը կազմել է 4,800,000.00 ՀՀ դրամ, կանխիկ գումարը՝ 4,153,000.00 ՀՀ դրամ, հաշվետու տարվա եկամուտները կազմել են 11,369,228.00 ՀՀ դրամ: