ՀԱՊԿ-ը պատրաստ է լիցքաթափել Հարավային Կովկասում իրավիճակը. Գլխավոր քարտուղար

Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Իմանգալի Տասմագամբետովը հայտարարել է ՀԱՊԿ երկրներին ուղղված մի շարք սպառնալիքների մասին՝ համաշխարհային խաղացողների միջև առճակատման ֆոնին, հայտնում է կազմակերպության մամուլի ծառայությունը։

«Միջազգային քաղաքական իրավիճակի վատթարացումը, գլոբալ և տարածաշրջանային մակարդակներում առճակատման ուժեղացումը ուղեկցվում է միջազգային հարաբերությունների համակարգի վերահսկելիության մակարդակի նվազմամբ։ Հետևանքը հիմնական խաղացողների աշխարհաքաղաքական և աշխարհատնտեսական շահերի հատման կետերում ճգնաժամային իրավիճակների առաջացումն է։ Իրավիճակը սրվում է հիբրիդային տեխնոլոգիաների կիրառմամբ, ինչը զգալիորեն բարդացնում է սպառնալիքների ճանաչումը և ազգային ինքնիշխանության խախտման փաստերի հաստատումը»,-ասել է Տասմագամբետովը Մոսկվայում ԱՊՀ անդամ երկրների անվտանգության խորհուրդների քարտուղարների XI նիստում։ 

«Ցավոք սրտի, գլոբալ մակարդակով առճակատումը անխուսափելիորեն ազդում է տարածաշրջանային և նույնիսկ ենթատարածաշրջանային մակարդակների վրա, որտեղ հին խնդիրները վատանում են և նորերը ի հայտ են գալիս: Դրանց լուծումը հավելյալ ջանքեր է պահանջում խաղաղության և կայունության ապահովման մեխանիզմների մշակման համար, որոնք կհամապատասխանեն ժամանակի պահանջներին։ Դա լիովին վերաբերում է ՀԱՊԿ պատասխանատվության ոլորտին։ Այս տարածքն արդեն դարձել է մի վայր, որտեղ փորձարկվում են տարբեր հիբրիդային տեխնոլոգիաներ և ձևավորվում են լուրջ սպառնալիքներ կազմակերպության անդամ երկրների ներքին կայունությանը։ Ըստ այդմ, այստեղ մեծանում է ենթատարածաշրջանային համագործակցության դերը անվտանգության ոլորտում, քանի որ հաճախ տեղական խնդիրներն այնքան սպեցիֆիկ բնույթ են կրում, որ ոչ մի միջազգային կազմակերպություն չի կարողանում դրանք լուծել»,- ասել է ՀԱՊԿ գլխավոր քարտուղարը։

«Դրանք ներառում են տարածքային վեճեր, սահմանային խնդիրներ և սահմանային հակամարտություններ։ Սակայն նման հարցերի աստիճանական լուծման դրական օրինակներ ունենք։ Այսպիսով, Տաջիկստանի և Ղրղզստանի միջև կոնֆլիկտային իրավիճակը աստիճանաբար կարգավորվում է, ընդ որում՝ առանց միջնորդների, բայց պետությունների ղեկավարների ջանքերի շնորհիվ։ Աշխատանքներ են տարվում ընդհանուր սահմանի հատվածների սահմանազատման և սահմանագծման ուղղությամբ»,- ասել է նա։

Խոսելով Հարավային Կովկասում տիրող ծանր իրավիճակի մասին՝ նա ևս մեկ անգամ կենտրոնացել է այն փաստի վրա, որ «ՀԱՊԿ որոշման նախագիծը, որն ուղղված էր տարածաշրջանում իրավիճակը լիցքաթափելուն, և որը, ցավոք, չընդունվեց անցած նոյեմբերին ՔԱԽ նիստում, մնում է ուժի մեջ է, եթե ձեռք բերվի կոնսենսուս»: