Ինչ ճակատագրի արժանացավ Փաշինյանի խոստումներին հավատացած փոքր և միջին բիզնեսը

Վերլուծական 16 Մարտ, 2024 20:14

Հեղափոխության օրերին, ի թիվս այլ խոստումների, Նիկոլ Փաշինյանը և թիմակիցները հավաստիացնում էին, որ պատրաստվում են թեթևացնել փոքր և միջին բիզնեսի, առևտրականների հոգսերը: 2018-ին Փաշինյանը հայտարարում էր, որ ՀՀ կառավարության քաղաքականությունը պետք է ուղղված լինի փոքր ու միջին ձեռնարկատիրության պաշտպանությանը, դրանց զարգացմանը, ոչ թե խոշորների կողմից «կլանմանն» ու «կուլ գնալուն»: «Գաղափարներ կան, բանավեճ կա դրանց շուրջ, թե փոքր ու միջին ձեռնարկատիրության աջակցության որ մեխանիզմներն են հատապես արդյունավետ, որպեսզի կիրառենք ու ռեալ պայմաններ ստեղծենք ՓՄՁ-ների զարգացման համար»,- ասում էր Նիկոլ Փաշինյանը։

Հեղափոխությունից վեց տարի անց այդ հոգսերը ոչ միայն չեն թեթևացել, այլ վստահորեն կարող ենք ասել, որ առևտրականները դարձել են ամենախոցելի խավերից մեկը:

Դիցուք՝ խոշոր բիզնեսին ստվերից հանելու փոխարեն կառավարության ձեռնարկած օրենսդրական փոփոխություններն ամեն անգամ ավելի ծանր վիճակի մեջ են դնում փոքր ու միջին բիզնեսի ներկայացուցիչներին։ Բանն այն է, որ խոշորները հաճախ գերադասում են իրենց բիզնեսը տրոհել մի քանի փոքր բիզնեսների, որպեսզի կարողանան օգտվել ավելի բարենպաստ հարկման ռեժիմից։ Խնդրի մասին պարբերաբար բարձրաձայնում են նաև կառավարությունում և որպես լուծում առաջարկում ՓՄՁ–ների գործունեությունն ավելի խստացնող կարգավորումներ` հույսով, որ այդ կերպ հարկային այդ դաշտն այլևս գայթակղիչ չի լինի շուկայի մեծ խաղացողների համար։

Մեկ այլ օրինակ՝ 2022-ի հուլիսի 1-ից ուժի մեջ մտած կանխիկ գործառնությունների շեմ սահմանող օրենքը։ Այն, մեր զրուցակցի հավաստմամբ, փոքր և հատկապես միջին բիզնեսին մեծ հարված հասցրեց և ահռելի եկամուտներ ապահովեց բանկերի համար։

Կարող ենք հիշել նաև ՀԴՄ կտրոնների վրա ամբողջ ապրանքացանկը ԱՏԳ (արտաքին տնտեսական գործունեության) կոդերով տպելու շեմը մինչև 24 մլն շրջանառություն ունեցողների համար իջեցնելու որոշումը, որի հետևանքով պահանջը վերաբերեց, օրինակ ամսական 2 մլն դրամի առևտուր անող փոքր վաճառակետերին։ Սա դեռ ամբողջը չէ, 2024 թ–ի հունվարի 1-ից ուժի մեջ են մտել արդեն ընդունված օրենսդրական նոր կարգավորումներ ու սահմանափակումներ, որոնք, ըստ Գրիգորյանի, շատ ավելի վատ դրության մեջ են դնելու փոքր ու միջին բիզնեսին։ Այս տարվանից ՓՄՁ–ներին կհասնի եկամուտների պարտադիր հայտարարագրումը, առողջապահական համընդհանուր ապահովագրությունը, առանց փաստաթղթավորման ապրանքների դեպքում շրջհարկի 20 տոկոս տույժի կիրառման օրենքը, նաև` ապրանքային մնացորդը պարտադիր գույքագրելու պահանջը և այլն։

Երեկ էլ հայտնի դարձավ, որ Կոմիտասի պողոտայի շուկան փակվում է, առևտրականների խոսքով՝ մինչև ապրիլի 15-ը նրանց ժամանակ են տվել տարածքն ազատելու համար։ Մտահոգված են, որ ապրանքը չեն հասցնի վաճառել, ասում են՝ ապրանքներն իրացնելու համար նոր տարածք չեն տալիս, փողոցային առևտուրն էլ արգելված է։ Նրանց խոսքով՝ շուկան առել են ու մոտ 100 առևտրական ապրիլի 15-ից հետո մնալու է դրսում:

Շարունակելի..