ԵՄ–ի սառը ցնցուղը՝ Հայաստանի իշխանությունների համար

Հայաստանում ԵՄ դեսպան Վասիլիս Մարագոսն ուշագրավ հարցազրույց է տվել Հայաստանի վրա Ադրբեջանի հնարավոր հարձակման դեպքում Եվրամիության արձագանքի, Ադրբեջանի դեմ պատժամիջոցներ սահմանելու հնարավորության, Հայաստանի՝ Եվրամիության անդամության թեկնածու դառնալու հեռանկարների և «Խաղաղության եվրոպական գործիքի» միջոցով Հայաստանին ռազմական աջակցություն տրամադրելու շուրջ։

 Հնարավոր պատերազմի դեպքում Եվրամիությունն ի՞նչ քայլեր կձեռնարկի Ադրբեջանի դեմ հարցին դեսպանը բավական ցրողական պատասխան է տվել՝ նշելով, որ Եվրամիությունը հանձնառու է նպաստելու այս տարածաշրջանում խաղաղության հաստատմանն ու հարաբերությունների կարգավորմանը։ Թե ինչ գործիքակազմով է ԵՄ-ն նպաստելու այդ խաղաղաթյան հաստատմանը՝ Մարագոսը չի բացահայտում՝ հասկացնելով, որ Հայաստանին անվտանգության երաշխիքներ ԵՄ-ն պատրաստ չէ տրամադրել:

Որքանո՞վ է այս փուլում հավանական, որ Հայաստանը Եվրամիությանն անդամակցելու թեկնածուի կարգավիճակ ստանա հարցին դեսպանը նույնպես հստակ պատասխան չի տվել՝ նշելով, որ  եվրոպական ցանկացած երկիր կարող է դիմել Եվրամիությանն անդամակցելու թեկնածուի կարգավիճակ ստանալու համար, բայց այժմ Հայաստանն ու ԵՄ-ն աշխատում են գործընկերության նոր օրակարգի ուղղությամբ, որի մեկնարկը տրվեց փետրվարին։ Դեսպանի պատասխանից կարելի  է կռահել, որ ԵՄ-ն այս պահին Հայաստանի հաշվին ընդլայնվելու որևէ ծրագրեր չունի և դա չի դիտարկում իբրև առաջնահերթություն: 

Ակնհայտ է, որ ԵՄ-ն չունի նաև Հայաստանի հետ վիզային ռեժիմն ազատականացնելու ցանկություն և նպատակ՝ առնվազն մոտ ապագայում, եվրոպացի պաշտոնյաները իրենց հրապարակային ելույթներում չեն զլանում շեշտել, որ այս հարցի վերաբերյալ քննարկումներ պետք է տեղի ունենան: Ասել է թե, անգամ քննարկումների փուլը հայկական կողմը դեռևս չի հաղթահարել և ավարտին չի հասցրել:

Հայաստանում ԵՄ դեսպանը փաստացի ցրում է Նիկոլ Փաշինյանի և նրա թիմակիցների կողմից տարածվող այն միֆերը, որ ԵՄ-ն գրկաբաց մեզ է սպասում, որ վիզաների ազատականացման հարցը մոտ շաբաթների կամ ամիսների լուծվելիք հարց է, և ինչն էլ ավելի կարևոր է, որ հնարավոր ռազմական ագրեսիայի դեպքում ԵՄ-ն կարող է Հայաստանին պաշտպանել և տրամադրել անվտանգության երաշխիքներ: ԵՄ դեսպանի հարցազրույցը կարելի է դիտարկել իբրև մեսիջ, որ ԵՄ-ն թեև ցանկանում է Հայաստանի ձեռքերով և Հայաստանի հաշվին դուրս մղել ՌԴ-ին Հարավային Կովկասից, այնուամենայնիվ Հայաստանի հետ ռազմավարական հարաբերություններ զարգացնելու, ՀՀ տնտեսությանը զարկ տալու և անվտանգային միջավայրը բարելավելու որևէ իրական նպատակ չի հետապնդում...