Զարուհի Փոստանջյան. «ՀՀԿ-ականները ոչ թե փախուստի դիմեցին, այլ…»

Լուրեր.com-ի զրուցակիցն է ԱԺ «Ժառանգություն» կուսակցության պատգամավոր Զարուհի Փոստանջյանը։

–Ինչպե՞ս եք գնահատում ՀՀԿ-ի կողմից ԱԺ արտահերթ նիստի տապալումը։

–Իհարկե, դրական չեմ գնահատում, սա բացասական երևույթ է։ ՀՀԿ-ականները չցանկացան ծավալել բանավեճ։ ԱԺ-ում պետք է տեղի ունենան քննարկումներ, բանավեճեր։ Եթե նրանք մասնակցեին, ապահովեին քվորումը, ապա այդ բանավեճը տեղի կունենար, և հենց կարծիքների փոխանակության արդյունքում նոր կարելի էր ասել, թե որ կողմն է հիմնավոր ներկայացնում իր փաստարկը, որ կողմը՝ ոչ։ Այդ ամենից հետո նոր որոշում կկայացվեր։ Թող այդ ժամանակ դեմ քվեարկեին։

Մեզ՝ ԱԺ-ի պատգամավորներիս, գումար են վճարում, որ մենք այստեղ հասարակության կարծիքը ներկայացնենք, բանավիճենք, բանավիճելու արդյունքում ընդունենք որոշում։

Այս բանավեճը կա հասարակության մեջ և այս բանավեճը պետք է նաև այս հարթակում տեղի ունենա, որովհետև սա է քաղաքական ամբիոնը և քաղաքական բանավեճերի վայրը։ Սա, իհարկե, խոսում է ժողովրդավարության սկզբունքերի բացակայության մասին և մեր այն իրողության մասին, որ մեծամասնությունն ունի հնարավորություն և այդ բոլշևիզմյան գաղափարախոսության ներքո նորից պնդում է իր գեգեմոն դիրքորոշումը, և շարունակաբար այստեղ ժողովրդավարության պակաս է զգացվում։ 

–Տիկի՛ն Փոստանջյան, հնարավո՞ր է ԱԺ խմբակցություններով դիմեք էթիկայի հանձնաժողով։ 

Ո՛չ։ ԱԺ-ի էթիկայի հանձնաժողովն ունի իր գործառույթները, օրենքի իր որոշակի պահանջները։ Բայց այստեղ, եթե նրանք ունեցել են քաղաքական որոշում՝ չմասնակցել ԱԺ արտահերթ նիստին, սա էթիկայի խնդիր չի հարուցում։ Սա այլ խնդիր է՝ մենք դեռ շատ հեռու ենք ժողովրդավարությունից։

–Սա փախո՞ւստ էր։

–Փախուստի խնդիր չկա, որովհետև այստեղ ավելի շատ նրանք այդ գիտակցության կրողը չեն։ Ժամանակն է մեր մեջ սերմանել, որ մենք ժողովրդավար պետության կրողներն ենք։ Այստեղ այս խնդրի բացակայությունն է, ոչ թե փախուստն է։ Իրենք կարող էին իրենց դեմ կամ կողմ քվեարկությամբ կարծիք հայտնել, իսկ բանավեճ ծավալելու համար իրենք այդ գիտակցության կրողը չեն։ Իրենք չեն գալիս բանավեճի հեռուստաեթերներում։  

Միևնույնն է, որոշումն ընդունվելու էր քվեարկությամբ։ Սա ժոովրդավարության տարրերից է, մենք որոշումները կայացնում ենք կոլեգիալ և քվեարկությամբ։ Դուք էլ գայիք և բանավիճեիք, բայց պետք է դրա կրողը լինեիք, որ կարողանայիք բանավիճել։

–Կարելի՞ է, այնուամենայնիվ, ընդդիմության կողմից արտահերթ նիստ հրավիրելը դրական քայլ համարել, քանի որ վերջին 15 տարիների համար սա աննախադեպ էր։

–Դրական քայլ կհամարեի, եթե սա չլիներ նախագահական ընտրություններին ընդառաջ։ Միանշանակ համոզմունք չունեմ, որ այս քաղաքական ուժերն իրոք ժողովրդավարական գործընթացի կրողներն էին։