ՀՀ-ում մեկնարկել է մարդու իրավունքների պաշտպանությանը վերաբերող ծրագիրը` 2,6 մլն դոլար արժողությամբ

Տեսանյութեր 17 Հուլիս, 2024 14:34

Հայաստանում մեկնարկել է «Մարդու իրավունքների պաշտպանության խթանում և ազգային հաստատությունների հզորացում» ծրագիրը` 2,6 միլիոն դոլար արժողությամբ։ Ծրագիրը ֆինանսավորվում է Եվրոպական միության կողմից և համատեղ իրականացվում ՄԱԿ-ի Զարգացման ծրագրի (ՄԱԶԾ), ՅՈՒՆԻՍԵՖ-ի և ՄԱԿ-ի Բնակչության հիմնադրամի կողմից։

Ծրագրի շնորհանդեսին բացման խոսքով հանդես եկան Հայաստանում ԵՄ պատվիրակության ղեկավար, դեսպան Վասիլիս Մարագոսը, ՀՀ մարդու իրավունքների պաշտպան Անահիտ Մանասյանը, ՀՀ արդարադատության նախարարի տեղակալ Կարեն Կարապետյանը, ՀՀ ներքին գործերի նախարարի տեղակալ Արփինե Սարգսյանը, ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը և այլք։ Ելույթներից հետո տեղի ունեցավ ծրագրի ստորագրման հանդիսավոր արարողությունը։

Վերջերս իրականացված ոլորտային վերլուծությանը համապատասխան և առաջնորդվելով շահագրգիռ կողմերի հայեցակարգային ուղղորդմամբ՝ ծրագիրը նպատակաուղղված է Հայաստանում մարդու իրավունքների զարգացմանը, քաղաքականության զարգացմանը և հանրային իրազեկմանը։

Դրա շրջանակը ենթադրում է կարևորագույն հարցերի հասցեագրում, ինչպիսիք են խտրականության կանխարգելումը, անվճար իրավաբանական օգնությունը և սահմանադրական բարեփոխումները՝ 2023-2025 թթ․ Մարդու իրավունքների գործողությունների ծրագրի և մոնիթորինգի ու գնահատման շրջանակի ամրապնդման հատուկ շեշտադրմամբ։

Վերոնշյալ նախաձեռնությունները պետք է համախմբվեն վեց հիմնական վերջնարդյունքների ապահովման շուրջ, մասնավորապես․

ՄԻՊ-ի և ՄԻՀՆ-ի ինստիտուցիոնալ կարողությունների հզորացում՝ մարդու իրավունքների պաշտպանության և խթանման ու նրանց ծառայությունների հասանելիության լավարկման գործում։

ՄԻԳԾ 2023-2025 թթ․ ծրագրի իրականացման համակարգման, հաղորդակցության, մոնիթորինգի և գնահատման բարելավում և ՄԻԳԾ պատասխանատու կառույցների կարողությունների հզորացում։

Մարդու իրավունքների հարցերի վերաբերյալ հանրության իրազեկում՝ հատուկ ուշադրություն դարձնելով խոցելի և անապահով խմբերի մարդու իրավունքներին։

Արդարադատության նախարարության կարողությունների հզորացում մարդու իրավունքների, արդարադատության և սահմանադրական բարեփոխումների և հանրության իրազեկվածության բարձրացման մասով։

Աջակցման զոհակենտրոն ծառայությունների ընդլայնում՝ գենդերային հիմքով բռնությունից ու սեռական բռնությունից վերապրածների համար։

Խոցելի բնակչությանն անվճար որակյալ իրավաբանական օգնության տրամադրման մեխանիզմների ու կարողությունների խթանում։

Այս անմիջական արդյունքների ապահովմամբ ծրագիրը նպատակադրում է տևական ազդեցություն ձևավորել Հայաստանում մարդու իրավունքների պաշտպանության ոլորտում՝ ապահովելով լավ կառավարման, իրավունքների գերակայության, մարդու իրավունքների նկատմամբ հարգանքի սկզբունքների արմատավորում հանրության սպասարկման ու հասարակական գործելակերպում։

Ծրագիրը կտևի մինչև 2027 թվականի մայիսի 31-ը։