Ի՞նչ է պետք հաշվի առնել նոութբուք գնելիս․ մասնագետի օգտակար խորհուրդները

Կրթական նպատակներով նոութբուք ընտրելիս պետք է հաշվի առնել մի քանի հիմնական գործոն՝ համոզվելու համար, որ սարքը համապատասխանում է օգտագործողի կարիքներին: Այս գործոնները Gazeta.ru-ի հետ զրույցում թվարկել է MTS-ի «Էլեկտրոնիկա» կատեգորիայի ապրանքների մանրածախ ցանցի տնօրեն Նինա Պլաստինինան։

Առաջինը պետք է որոշել, թե ինչ խնդիրների համար է օգտագործվելու նոութբուքը: Եթե սարքն օգտագործվելու է հիմնական գործառույթների համար, ինչպիսիք են տեքստերի հետ աշխատելը և տարբեր կայքեր այցելելը, ապա հարմար կլինեն ավելի մատչելի մոդելները: Ավելի բարդ առաջադրանքներ, ինչպիսիք են ծրագրավորումը, գրաֆիկական դիզայնը կամ խաղերը, կպահանջեն ավելի հզոր սարքավորում:

Ուսումնական նպատակներով խորհուրդ է տրվում ընտրել Intel Core i3 կամ i5 պրոցեսորներով նոութբուքներ, որոնք լավ կատարողականություն են ապահովում առաջադրանքների մեծ մասի համար։ Կարևոր է նաև ուշադրություն դարձնել օպերատիվ հիշողությանը (RAM), որը պետք է լինի առնվազն 8 ԳԲ և ավելին, ինչպես նաև SSD կրիչներին՝ սկսած 256 ԳԲ և ավելի հզորությամբ, որպեսզի օպերացիոն համակարգը և հավելվածներն արագ բեռնվեն։

Էկրանի չափը նույնպես կարևոր դեր է խաղում: Օպտիմալ չափը կլինի 11–14 դյույմի միջակայքում, էկրանը պետք է լինի առնվազն Full HD կետայնության, ունենա փայլատ ծածկույթ, Eye Comfort աչքի պաշտպանության ռեժիմ՝ մուլտիմեդիա բովանդակությամբ հարմարավետ աշխատանքի համար:

Անհրաժեշտ է նաև հաշվի առնել բավական քանակությամբ USB միակցիչների առկայությունը արտաքին սարքերի միացման համար, ինչպիսիք են ֆլեշ կրիչները, տպիչները կամ արտաքին մոնիտորները: Համակարգչային խաղերով կամ տեսանյութերի խմբագրմամբ հետաքրքրվող օգտատերերին խորհուրդ է տրվում ընտրել դիսկրետ գրաֆիկական քարտերով սարքեր:

Նոութբուք գնելուց առաջ կարևոր է ստուգել, թե ինչ օպերացիոն համակարգ է տեղադրված դրա վրա՝ որոշ ծրագրերի կիրառման հնարավոր դժվարություններից խուսափելու համար։ Պետք է ուշադրություն դարձնել նաև մարտկոցի աշխատանքին, որը պետք է լինի առնվազն 6 ժամ առանց վերալիցքավորման, ինչպես նաև բարձրախոսների և վեբ-տեսախցիկի որակին՝ առցանց դասերի և դասընկերների հետ շփման համար։