ԲՏԱ նախարարությանը 2025թ. բյուջեով կհատկացվի 47.5 միլիարդ դրամ

Բարձր տեխնոլոգիական արդյունաբերությանը 2025 թվականի պետական բյուջեի նախագծով նախատեսվում է հատկացնել 47.5 միլիարդ դրամ, որի շրջանակներում կիրականացվի  5 բյուջետային ծրագիր՝ 20 միջոցառումներով:Ազգային ժողովի մշտական հանձնաժողովների համատեղ նիստում «Հայաստանի Հանրապետության 2025 թվականի պետական բյուջեի մասին» ՀՀ օրենքի նախագծի քննարկման ժամանակ այս մասին ասաց ԲՏԱ նախարար Մխիթար Հայրապետյանը։

«Բարձր տեխնոլոգիաների, ռազմարդյունաբերության, թվայնացման, կիբեռանվտանգության, ինովացիոն տեխնոլոգիաների, կապի, փոստի, համացանցի և տիեզերական  բնագավառներում պետական քաղաքականության մշակում,  ծրագրերի համակարգում և մոնիտորինգ» միջոցառման համար 2025 թվականի կհատկացվի 1,015 մլրդ դրամ, որն ուղղվելու է նախարարության պահպանմանը»,- ասաց Հայրապետյանը։

Նա նշեց, որ բարձր տեխնոլոգիական արդյունաբերության էկոհամակարգի և շուկայի զարգացման ծրագրի գծով 2025 թվականին նախատեսվել է հատկացնել 32 միլիարդ 810 միլիոն դրամ։

«Ծրագրի նպատակը բարձր տեխնոլոգիական ոլորտի ենթակառուցվածքների բարելավումն է, որի  շրջանակներում կիրականացվեն հետևյալ բյուջետային միջոցառումները՝  «Մասնագետների պատրաստման ԲՈւՀ-մասնավոր հատված համագործակցություն» միջոցառման համար կհատկացվի 413 միլիոն դրամ, որի շրջանակում նախատեսվում է իրականացնել կադրերի թիրախավորված պատրաստում և վերապատրաստում՝ հաշվի առնելով շուկայի զարգացումներն ու կադրերի նկատմամբ շուկայի պահանջարկի կտրուկ աճը, ինչը կնպաստի նոր տեխնոլոգիական կենտրոնների/լաբորատորիաների ստեղծմանն ու զարգացմանը, ինչպես նաև արդեն իսկ գոյություն ունեցող կենտրոնների որակյալ կադրերով համալրված արդյունավետ գործունեության ապահովմանը: Սույն ծրագրի շրջանակներում ստեղծվում է միջավայր, որտեղ կրթական հաստատությունները անմիջական կապի մեջ են լինում ոլորտային կազմակերպությունների հետ, ինչպես նաև ամենօրյա մոնիթորինգ է իրականացվում կազմակերպություններին անհրաժեշտ/աշխատող աշխատակիցներին առաջադրվող մասնագիտական պահանջների մասով»,- նշեց Հայրապետյանը։

Նախարարը տեղեկացրեց, որ շուկաների զարգացում և միջազգային համագործակցություն միջոցառման համար 2025 թվականին կհատկացվի 345 միլիոն դրամ։

«Նշյալ միջոցառման շրջանակներում նախարարության կողմից ընտրվում են ոլորտային միջազգային հեղինակավոր ցուցահանդեսներ և աջակցություն է ցուցաբերվում հայկական ոլորտային ընկերություններին և միություններին դրանցում ներկայանալու համար։ Նախարարությունը պատասխանատու է ցուցահանդեսի կազմակերպչից միասնական տաղավարի տարածքի վարձակալության, տաղավարի դիզայնի, նախագծման և կառուցապատման աշխատանքների համար»,- ասաց Հայրապետյանը։

Նախարարի խոսքով՝ ձեռներեցության տեխնոլոգիական էկոհամակարգ միջոցառման գծով կհատկացվի 748.5 միլիոն դրամ։

«Միջոցառման նպատակն է զարգացնել բարձր տեխնոլոգիական ոլորտի համար անհրաժեշտ էկոհամակարգը` ներառյալ թիրախավորված գիտահետազոտական աշխատանքների, ստեղծագործական խմբերի, նորաստեղծ ընկերությունների ֆինանսավորումը, հայկական Սփյուռքի, Հայաստանում համահայկական ներուժի ու կարողությունների ներգրավվածությունն ապահովելու համար Հայաստանի և Սփյուռքի կազմակերպությունների և անհատների հետ ստեղծել շարունակական համագործակցության հարթակներ:

Բացի նշված միջոցառումներից՝ Հայրապետյանը տեղեկացրեց, որ շուրջ 29.4 մլրդ. դրամ է նախատեսվել տեղեկատվական տեխնոլոգիաների ոլորտում գործունեություն իրականացնող առևտրային կազմակերպություններին և անհատ ձեռնարկատերերին պետական աջակցություն տրամադրելու նպատակով։

«Ինժեներական բիզնես աքսելերատորի շենքի և ընդհանուր ենթակառուցվածքների համակարգման, պահպանման և սպասարկման աշխատանքների իրականացում» միջոցառման համար կհատկացվի 36 միլիոն դրամ, որը կուղղվի Ինժեներական քաղաքում տեղակայված էլեկտրաէներգիայի գծով գերհամակարգչի սպասարկման ծախսերին:

«Ինժեներական բիզնես աքսելերատորի շենքի կառուցման և կահավորման շարունակականության ապահովում» կապիտալ միջոցառման գծով կհատկացվի 1.1 մլրդ դրամ, որը արդյունքում կշարունակվեն բիզնես աքսելերատորի շենքի կառուցման և տարածքի բարեկարգման աշխատանքները։

Հեռահաղորդակցության ապահովում ծրագրի գծով 2025 թվականին նախատեսվել է հատկացնել 548  միլիոն դրամ»,- ասաց Հայրապետյանը։

Նախարարը հարկ համարեց նաև նշել, որ 2024 թվականին ավարտին կհասցվի 4.5 մլրդ դրամ արժեքով ռադիոմոնիտորինգի ծրագրի ներդրումը, որի նպատակ ունի լուծել տեղական և տարածաշրջանային մասշտաբներով քաղաքացիական, ռազմական և հատուկ նշանակության  ռադիոէլեկտրոնային միջոցների էլեկտրամագնիսական համատեղելիության և ռադիոհաճախականային խանգարումներին առնչվող խնդիրները, ապահովել ռադիոհաճախականությունների և հաճախականային շերտերի փաստացի օգտագործմանը վերաբերող տվյալների հավաքագրումն ու տրամադրումը:

«Ընդ որում, «Հեռահաղորդակցության հանրապետական կենտրոն» ՊՈԱԿ-ի կողմից իրականացվող գործունեության արդյունքում   երաշխավորվում է շուրջ 7 միլիարդ դրամի մուտք ՀՀ պետական բյուջե, որն առաջանալու է առևտրային նպատակներով ռադիոհաճախականային շերտերի շահագործման արդյունքում»,- եզրափակեց Հայրապետյանը։