«Սահմանազատումից» հետո Կիրանցը նորածին երեխայի նման բարուրել են, ձեռքերը կտրել․ ինչպե՞ս են Կիրանցում պատրաստվում ձմռանը (տեսանյութ)

Սահմանազատման քողի տակ Կիրանցը թշնամու հետ կիսելուց հետո տեղի բնակիչները առաջին ձմեռն են դիմավորելու, նոր անհարմարություններ` նոր իրավիճակով պայմանավորված։ Բայց մինչ այդ էլ աշնանացանի խնդրի առջեւ են կանգնած, չգիտեն՝ հացահատիկ հողի մեջ գցեն, թե ոչ․ արոտավայրերի կեսն անցել է թշնամուն։ Տավուշեցի լրագրող Ոսկան Սարգսյանը ԼՈՒՐԵՐ․com-ի հետ զրույցում ասաց, որ այս պահին, ընդհանուր առմամբ, գյուղում իրավիճակը խաղաղ է։

«Փաստացի Կիրանցը հայտնվել է «բարուրված» երեխայի կարգավիճակում․ կտրել են նրա թևերը։ Գյուղի թևերը կտրելով ու Ադրբեջանին տալով՝ փաստորեն գյուղը զրկվել է իր արոտավայրերից։ Անցյալ տարի գյուղացիները հացահատիկ էին ցանել, շատ հատվածներում, մեծ դժվարությամբ կարողացան վարուցանք անել, բայց նկատենք, որ շատ հատվածներում էլ մեր ցանածն ադրբեջանցիները հնձեցին։ Փորձն արդեն կա, որի պատճառով էլ այս տարի գյուղացիները չկարողացան աշնանացան անել․ գիտեն, որ գյուղատնտեսական աշխատանքներ իրականացնելուց դժվարություններ են ի հայտ գալու» ,- ասաց նա՝ շեշտելով՝ այն վարելահողերը (մոտ 67 հա), որտեղ պիտի ցորեն ցանվեր, գյուղացիներն այդ գործողությունից ստիպված հրաժարվել են։ Լրագրողի դիտարկմամբ՝ բացի այս խնդրից, մեկ այլ պրոբլեմ էլ է առաջ եկել։  

Կիրանցը մշտապես է աչքի ընկել իր անասնապահությամբ․ մարդիկ այստեղ մեծամասամբ այդ գործով են զբաղվել։ Լրագրողը հարց բարձրացրեց՝ սահմանազատումից հետո գյուղացիները որտե՞ղ պիտի պահեն իրենց անասուններին։

«Եղել են մարդիկ, որոնք մինչև 14 կով են պահել, իսկ հիմա ամբողջ գյուղում երևի թե 10 կով էլ չի մնացել։ Եթե գյուղացին հացահատիկ չի ցանում, չի մշակում, գյուղատնտեսությամբ, անասնապահությամբ չի զբաղվում, ապա ինչպե՞ս կկարողանա ապրել ու արարել իր գյուղն ու հայրենիքը» ,- հարցրեց լրագրողը։

Նրա խոսքով՝ գյուղում պետական աջակցությամբ ծրագրեր են կատարվում, տներ են կառուցվում, սակայն այն երիտասարդ ընտանիքները, որոնք օգտվում են այդ ծրագրից, պիտի լուծեն իրենց զբաղվածության հարցը, այլապես․․․։

«Կիրանցեցիները վաղվա օրվա նկատմամբ ոչ մի վստահություն չունեն։ Բացի 7 բնակչից, որոնք հրաժարվել են այդ փողերից, մնացած բոլորին պետբյուջեից փոխհատուցում են տվել։ Տավուշի մարզպետ Հայկ Ղալումյանը, որը հիշեցնեմ՝ Նիկոլ Փաշինյանի դասընկերն ու հարսանիքի խաչեղբայրն է, այդ բանակցությունները հենց ինքն է վարել ու որոշել, թե ում և որքան պիտի վճարվի» ,- շեշտեց Սարգսյանն ու հավելեց, որ գյուղում խոսակցություններ կան, որ նույնիսկ վագոն-տնակի համար 50 հազար դոլար են տվել։

Հարցին, թե ձմռանն ընդառաջ ի՞նչ պատրաստություններ են տեսնում կիրանցեցիները, լրագրողն ասաց՝ շատերն իրենց տնամերձ հողամասերը մշակելու արդյունքում կարողանում են ձմռան համար ինչ-որ պաշար հավաքել։ Սուր է նաև վառելափայտի խնդիրը։

«Փաստացի գյուղացին իր տարածքներից զրկվել է, հետևաբար անասնապահությամբ ու հողագործությամբ չի կարող չի զբաղվել։ Հիմա մարդիկ մնացել են տնամերձ հողամասերից ստացվածի հույսին։ Դրանով կարող ես գոյատևել, բայց դա վաճառել և փորձել գումար վաստակել․․․ դժվար իրավիճակում է հայտնվել գյուղացին» ,- ասաց նա։

«Ամենաբերրի հողերը մնացել են թշնամու վերահսկողության տակ։ Նույնիսկ կան տեղեր, որտեղ ադրբեջանցիները մեր վարելահողերն են մշակում» ,- եզրափակեց լրագրողը։