Երբ հայկական ու ֆրանսիական համը զգում եմ մի երգում, դա ինձ համար մեծ հաճույք է․ Գարի Հակոբյան

Հայտնի երգերի խոսքերի հեղինակ Գարի Հակոբյանը, ով հայտնի է նրանով, որ գրել է Սոսո Պավլիաշվիլիի կատարած Վրաստան երգի բառերը, իսկ նրա Հայաստան երգը երգել են Ֆրանսիայում հենց ֆրանսերենով, ում հեղինակած երգերը հնչում են աշխարհի մեծ բեմերից, իսկ երգերը կատարում են այնպիսի հայտնի արտիստներ, ինչպիսիք են Սոսո Պավլիաշվիլին, Ավրաամ Ռուսոն, Ժեկան, Արթուր Ամիրյանը, Էդգար Գևորգյանը, Անգելինա Կապլան, Վաչե Ամարյանը, Արկադի Դումիկյանը և այլ հայտնի արտիստներ, Euromedia24.com-ի հետ զրույցում պատմել է իր ներկայիս գործունեության, ստեղածագործական ապագա պլանների մասին։

Պարոն Հակոբյան, որն է Ձեր առաջին երգը եւ երբ է թողարկվել այն

-2019 թվականին ես գնացի Արևմտյան Հայաստան և Բայազետի կողմից բարձրացա Արարատ սարի գագաթը, 2020 թվին գրեցի առաջին «Արարատ» երգի խոսքերը։

Հիշում եմ՝ տղաս ժամանակին դիմեց հայտնի բանաստեղծ, կոմպոզիտոր Արսեն Կասիևին, բայց իմանալով, որ Արսեն Կասիևը ոչ ոքի համար չի գրում երգի խոսքեր կամ երաժշտություն, դիմեց իրենց ընդհանուր ընկերոջը, ով միջամտեց, և Կասիևը համաձայնեց գրել «Արարատ» երգի երաժշտությունը, որը կատարեց Արթուր Ամիրյանը։

Արդեն երկրորդ երգի ժամանակ կրկին դիմեցինք նրան, սակայն, այդ անգամ նա հրաժարվեց։ Տղաս ասաց նրան՝ խնդրում եմ, ինձ ճիշտ հասկացեք, պատկերացրեք որքան դժվար է ինձ, երբ ես չեմ կարող իրականացնել հորս ցանկությունը։ Արսենի վրա ազդեցին այդ խոսքերը և նա համաձայնեց գրել «Արմենիա» երգի երաժշտությունը։ Հասկանալով, որ Արսեն Կասիևը շատ ուժեղ հայրենասեր է, իրեն տվեցինք նաև երրորդ երգի երաժշտությունը՝ «Էջմիածին», որը կատարեց Արթուր Ամիրյանը․ այդպես էլ սկսվեց մեր աշխատանքը Արսեն Կասիևի հետ։

Ունե՞ք երգեր, որոնց եւ երաժշտության եւ խոսքերի հեղինակն եք

-Ես դպրոցը ավարտելուց հետո սովորել եմ բժշկական ուսումնարանում, այդ ընթացքում գրել եմ 50 երգ, նվագում էի կիթառի վրա, 40-42 տարվա իմ երգերից 12 երգ կատարել են Արթուր Ամիրյանը և Անգելինա Կապլանը։ Յութուբում կան նաև իմ երգերը։ Այս տարի թողարկվել է ևս 2-3 երգ, շուտով դուրս կգա նաև երգ Ադլերի մասին։

Հեղինակային երգերի սեփական ալբոմ նախատեսո՞ւմ եք թողարկել

-Այո, ես ալբոմ  նախատեսում եմ թողարկել, առայժմ իմ հին երգերից եմ ուզում թողարկել, որոնք գրել եմ 40-42 տարի առաջ։

Ինչու եք հենց հենց կովկասյան շանսոնն ընտրել

-Ստեղծագործական ուղղությունը, որի վրա ես այսօր աշխատում եմ, ես չեմ ընտրել, այն ձևավորվել է իմ երիտասարդության տարիներին, ես շատ էի լսում Բոկային Դավիդյան, Վիսոցկուն, Արկադի Սևերին, և այն մեծ ազդեցություն է ունեցել իմ վրա և ազդել է իմ հետագա գործունեության վրա։

Սոսո Պավլիաշվիլին երգել է Ձեր հեղինակած «Վրաստան» երգը, ինչպես ստացվեց, ինչ պատմություն ունի այն

-Տղաներս ասացին, որ անպայման պետք է Վրաստանի մասին երգ ունենալ, քանի որ համ ես եմ ծնվել Թբիլիսիում, համ տղաներս, որոշեցինք, որ ամենահարմար կատարողը Սոսոն կլինի, ու նա տվեց իր համաձայնությունը, կատարեց երգը, Արսեն Կասիևն էլ երաժշտությունը գրեց։

Ձեր մեկ այլ հեղինակային «Հայաստան» երգը երգել են Ֆրանսիայում ու հենց ֆրանսերենով, այն կատարել է Կարեն Սարգսյանը, ի՞նչ ապրումներ եք ունեցել

-Ես վերապրել եմ այն զգացումները, որոնք ես ապրել էի, երբ լսել էի մեծանուն Շառլ Ազնավուրին։

Երբ հայկական ու ֆրանսիական համը զգում եմ մի երգում, դա ինձ համար մեծ հաճույք է։ Կա ևս մի երգ, որը կոչվում է «Փարիզ», այժմ աշխատում են երգի թարգմանության վրա, շուտով այն լույս կտեսնի, այդ երգում ևս հիշատակել եմ Շառլ Ազնավուրի անունը և մեր հայերի, ովքեր ապրում են Ֆրանսիայում, սակայն հոգով-սրտով  Հայաստանում են։

Մեզ հետաքրքիր է նաև Ձեր կարծիքը՝ որպես պրոֆեսիոնալի, Արկադի Դումիկյանի «Դուդուկ» երգի վերաբերյալ, քանի որ այն լայն տարածում ունեցավ ժամանակին և հայտնի է, որ գրվել էր հենց Հայոց ցեղասպանության զոհերի հիշատակի համար, ինչպիսին է Ձեր տպավորությունը։

-Առաջին հայացքից կարող է թվալ, թե դուդուկը պատմում է մեր ծանր կորստի, ցավի մասին, որը եղել է 20-րդ դարի սկզբին, բայց այդ երգում ես կոչ եմ անում պահպանել այն, ինչ մենք ունենք, այսինքն՝ մեր մշակույթը, սովորույթները, և այդ ամենը երկու կարևոր խոսքերում են ամփոփվում՝ «Նվագիր դուդուկ»։ Որքան դուդուկը նվագի, մենք ուժ կունենանք հիշել մեր անցյալը, ու մտածել մեր ապագայի մասին։

Ինչ երգեր եք նախատեսում թողարկել գալիք տարում Հայաստանի մասին։

-Գալիք տարում մինչև մայիս ամիսը կթողարկվի Արշակ Բեռնեցյանի «Յարխուշտա» երգը, հիմա աշխատում ենք «Հայերը և եզդիները» երգի վրա, Տիգրան Երկրորդի մասին ունեմ նաև երգ գրած, նրա մասին 25 օպերա կա, բայց երգ չկա, մի օր Արսեն Կասիևին ցույց տվեցի նրա մասին գրածս խոսքերը, ասաց՝ հիասքանչ է, ես կգրեմ այդ երգի համար համապատասխան երաժշտություն։ Շուտով պատրաստ կլինի նաև երգ, որը կատարում է Արիկ Դումիկյանը՝ «Բերդ պար», ապրիլի 24-ի համար պատրաստ է նաև մեկ այլ երգ՝ «Ինչի համար», այն կատարել է Արթուր Ամիրյանը։

Ոզում եմ ավելացնել, որ եղել եմ Արևմտյան Հայաստանում, եղել եմ Կարսում և գրել «Կարս» երգը, եղել եմ Անիում և գրել «Ասա Աստված» երգը, որը կատարել է Էդգար Գևորգյանը, եղել եմ Վանում, Էրզրումում և գրել այդ մասին երգեր։