Հարավային Կորեայում ինքնաթիռի կործանման հետևանքով 179 մարդ է զոհվել (տեսանյութ)

Հարավային Կորեայի Մուան նահանգում Jeju Air Boeing 737-800 ինքնաթիռի կործանման հետևանքով զոհվել է առնվազն 179 մարդ։ Բանգկոկից ուղևորվող ինքնաթիռը դուրս է եկել թռիչքուղուց և բախվել պարիսպին, հայտնում է Reuters-ը կիրակի՝ դեկտեմբերի 29-ին։

Վկայակոչելով տեղական MBC հեռուստաընկերության տրամադրած տեսանյութը՝ AFP-ն գրում է, որ վայրէջքի ժամանակ օդանավի շարժիչներից ծուխ է նկատվել, որից հետո կրակը պատել է օդանավը, փոխանցում է DW-ն։  

Ըստ նախնական վարկածի՝ աղետի պատճառը վայրէջքի ժամանակ ինքնաթիռի և թռչունների բախումն է եղել։ 

Ինքնաթիռում եղել է 181 մարդ՝ 175 ուղեւոր և անձնակազմի վեց անդամ։ ԶԼՄ-ների տվյալներով՝ ուղեւորներից 173-ը Հարավային Կորեայի քաղաքացիներ են, եւս երկուսը՝ Թայլանդի։ Ինչպես հաղորդում է Yonhap լրատվական գործակալությունը՝ ողջ է մնացել միայն երկու մարդ։ Նախնական տվյալներով՝ փրկվածներից մեկը անձնակազմի անդամ է, մյուսը՝ ուղեւոր։