Ինչ է պարզել Ամերիկյան հետախուզությունը Ռուսաստաի մասին

Անկախ այն հանգամանքից՝ ինչպես եւ երբ կավարտվի հակամարտությունն Ուկրաինայում, Ռուսաստանի ներկայիս աշխարհաքաղաքական, տնտեսական, ռազմական եւ ներքաղաքական միտումները խոսում են նրա կայունության եւ ԱՄՆ-ի գլոբալ շահերին շարունակվող սպառնալիքի մասին։ Այս մասին ասված է զեկույցում, որը հրապարակել է Սենատի հետախուզության հարցերով հանձնաժողովը:

«Մոսկվայի եւ Վաշինգտոնի միջեւ առկա աճող եւ տեւական ռազմաքաղաքական լարվածությունը, զուգորդված ռազմի դաշտում եւ պաշտպանական-արդյունաբերական համալիրում իր գերազանցության հանդեպ Ռուսաստանի աճող վստահությամբ, միջուկային պատերազմի ռիսկով, ինչպես հրատապություն, այնպես էլ բարդություններ են ստեղծում պատերազմը ընդունելի ավարտին հասցնելու ԱՄՆ ջանքերի համար»,-ասվում է փաստաթղթում:

Ամերիկյան հետախուզությունը նաև եկել է այն եզրակացության, որ արևմտյան երկրների կողմից սահմանված պատժամիջոցները և Ռուսաստանին մեկուսացնելու նրանց ջանքերը դրդել են վերջինիս ավելի ակտիվորեն փնտրել այլընտրանքային գործընկերներ: Հատկապես նշվում Է Չինաստանի դերը: 

ԱՄՆ հետախուզության կարծիքով՝ Պեկինն օգնել է շրջանցել պատժամիջոցներն ու արտահանման սահմանափակումները, ինչը թույլ է տվել Ռուսաստանի իշխանություններին շարունակել ռազմական գործողությունները և պահպանել ուժեղ դիրքեր էներգակիրների շուկայում՝ դրանով իսկ գլոբալ մարտահրավեր նետելով Վաշինգտոնին։ Կարևոր ներդրում է ունեցել նաև Ռուսաստանի համագործակցությունը Իրանի և ԿԺԴՀ-ի հետ:

Ամերիկյան հետախուզությունը կարծում է, որ պաշտպանական ծախսերի ավելացման եւ ռազմաարդյունաբերական համալիրում ներդրումների շնորհիվ Ռուսաստանը կկարողանա պահպանել կրիտիկական կարեւոր սպառազինությունների արտադրության բարձր մակարդակը, ինչպիսիք են հրետանին, հեռահար հրթիռները, կամիկաձե դրոնները եւ ռումբերը։ ինչը նրան կրակային հզորության առավելություն կտա Ուկրաինայի նկատմամբ:

Ամերիկյան հետախուզությունում կարծում են, որ Ռուսաստանը «չի կարողանա լիակատար հաղթանակ տանել» Ուկրաինայում։

Ամերիկյան հետախուզական ծառայությունների մոտ առանձին մտահոգություն է առաջացնում Ռուսաստանի միջուկային զինանոցը, որը, նրանց գնահատականներով, «ամենամեծն ու բազմազանն է»։ Այն կարող է «աղետալի վնաս» հասցնել ԱՄՆ-ին եւ հավասարեցնել Արեւմուտքի գերազանցությունը սովորական սպառազինություններում։