Մինչև 300 հազար դրամի հեծանիվ գնած ուսանողի և դասախոսի վարկի տոկոսադրույքը կսուբսիդավորի պետությունը

Շուրջ 5000 հոգու շրջանում հարցում է անցկացվել, և պարզվել է, որ բուհերի ուսանողների, դասախոսների, գիտահետազոտական ինտիտուտների աշխատակիցների շուրջ 0,3 տոկոսն է, որ հեծանիվ է օգտագործում իր ուսհաստատություն կամ աշխատավայր հասնելու համար: Այդ մասին Կառավարության՝ մարտի 27-ի նիստին ասաց ԿԳՄՍ նախարար Ժաննա Անդրեասյանը՝ ներկայացնելով հանրության շրջանում առողջ ապրելակերպի խրախուսման և երթևեկության այլընտրանքային ձևերի խթանմանն ուղղված որոշման նախագիծը:

«Հարցվածների 3,2 տոկոսը նշել է, որ կուզենար հեծանվով հասնել աշխատավայր կամ ուսհաստատություն, ինչը ցույց է տալիս, որ պատշաճ ենթակառուցվածքների ձևավորման և հեծանիվների կիրառումը խրախուսելու պարագայում հեծանվով տեղաշարժվող քաղաքացիների թիվը կարող է էապես աճել: Հետաքրքրություն կա նաև հեծանվի վաճառքով զբաղվող ընկերությունների շրջանում:

Ֆինանսական օժանդակություն կտրամադրվի այն շահառուներին, որոնք կարող են լինել բուհերի կամ ՄԿՈՒ հաստատությունների աշխատակիցներ կամ սովորողներ ՀՀ տարածքում գործող և լիցենզավորված բանկերից կամ վարկային կամակերպություններից ստացվող նպատակային վարկերի տոկոսադրույքների սուբսիդավորման ձևով»,-ասաց նա:

Նախարարի խոսքով, նախատեսում են, որ վարկի գումարը կարող է լինել մինչև 300 հազար դրամ, որը, մեր վերլուծությունների համաձայն, միանգամայն բավարար է տարբեր դասի որակյալ հեծանիվ, ինչպես նաև անհրաժեշտ պարագաներ ձեռք բերելու համար մինչև 36 ամիս ժամկետով:

Վարչապետ Նիկոլ Փաշինյանն արձագանքեց՝ այս որոշմամբ այն ուսանողներին և դասախոսներին, որոնք պատրաստ են դիտարկել հեծանվով դասի գնալը կամ հեծանիվը որպես տրանսպորտային միջոց օգտագործելը, Կառավարությունը պատրաստ է աջակցել՝ այդ նպատակով վերցրած վարկի տոկոսի սուբսիդավորման ձևով: Վարկի տարեկան դրույքաչափը 16 տոկոս է, և Կառավարությունը կսուբսիդավորի ու կզրոյացնի այն: