Վերջին 2,5 տարում Երևանում՝ ընդհանուր 45,8 հա տարածքում, տնկվել է 20.000 ծառ, որից 100-ը՝ սակուրա

Հասարակություն 31 Մարտ, 2025 12:03

Վերջին 3 տարվա ընթացքում Երևան քաղաքում տնկվել է 45,8 հա նոր կանաչ տարածք և 20 հազար նոր ծառ: Քաղաքապետարանի այս հաղորդագրությանը սոցցանցերում արձագանքել են քաղաքացիներ՝ հարցնելով, թե որտե՞ղ են տնկվել այդ ծառերը: Այդ մասին Երևանի քաղաքապետարանի գործակարգավարական խորհրդակցության ժամանակ ասաց Երևանի քաղաքապետ Տիգրան Ավինյանը, ապա, խոսքն ուղղելով «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանին, խնդրեց մանրամասնել, թե որտե՞ղ են տնկվել այդ ծառերն ու հատկապես սակուրաները:

Արմեն Բեգոյանը նախ առաջարկեց այցելել «Եռաբլուր» պանթեոնին հարող լանջեր, որտեղ, ըստ նրա, 15 հեկտար տարածքում տնկվել է քաղաքային ուրբան անտառ, օգտագործվել են բազմաթիվ պտղատու ծառեր, հիմնականում՝ ծիրանենիներ, որոնք այս պահին ծաղկման փուլում են: Մարզահամերգային համալիրի մուտքին հարող 8,5 հեկտար հողատարածքի վրա ևս ստեղծվել է ուրբան անտառ: Ծառեր են տնկվել նաև «Հաղթանակ» զբոսայգուն հարակից լանջերին՝ 5 հեկտար տարածքում, Նորքի երբեմնի այգիներում՝ 7 հեկտար տարածքում, Ավանի լանջերին՝ 1 հեկտար, Նոր Նորքի 6-րդ զանգվածում, այն է՝ Լյուքսեմբուրգի փողոցին հարող տարածքում՝ 1 հեկտար: «Փարոսի» բլրի վրա ևս ստեղծվել է ագրոանտառ:

Քաղաքապետը հետաքրքրվեց, թե 20 հազար ծառերից քանի սակուրա է տնկվել, Բեգոյանն պատասխանեց. «2022 թվականից մինչև վերջերս Երևանի քաղաքապետարանը ձեռք է բերել ընդամենը 100 սակուրա, այդ 100 սակուրայից ավելի տնկած չենք կարող լինել, բայց իմ տեղեկություններով դեռ մի քանիսը տնկված չեն: Եթե հաշվենք, որ այդ 100-ն էլ տնկված են, ասենք, որ 20.000-ի մեջ ընդամենը 100 սակուրա է եղել»:

Ի՞նչ եք արել, որ ծառերը չչորանան՝ հետաքրքրվեց Ավինյանը: Բեգոյանը տեղեկացրեց, որ որևիցե տունկ չի իրականացվում առանց՝ տվյալ տարածքում ոռոգման համակարգ անցկացնելու:

Ավինյանն արձագանքեց. «Ստացվում է, որ վերջին 2,5 տարվա ընթացքում Երևան քաղաքում տնկել ենք 45,8 հա նոր հատվածներում ծառեր, այդ ամբողջն ապահովել ենք ոռոգման համակարգերով, տնկել ենք մոտավորապես 20 հազար տնկի, տնկել ենք տնկիներ, որոնք դիմացկուն են, գիտնականներն ամբողջ ցանկով անցել են և վստահ են, որ այդ ծառերն ապրելու են, ապահովել ենք այդ ծառերի 94 տոկոս կպչողականություն»: