5 պաշտոնական նամակ՝ նորաստեղծ Հանրային խորհրդին. Հայկ Դեմոյան

Ցեղասպանության ինստիտուտ-թանգարանի նախկին տնօրեն Հայկ Դեմոյանը նորաստեղծ Հանրային խորհրդին պատրաստվում է հասցեագրել հինգ պաշտոնական նամակ՝ հետևյալ թեմաների շուրջ.

«1. Գործող իշխանությունների կողմից Հայոց ցեղասպանության պատմական իրողության ժխտում, ցեղասպանության զոհերի հիշատակի պղծում ու ծանրագույն հանցագործության միջազգային ճանաչման գործընթացի կասեցում:

2. Իշխանության ներկայացուցիչների կողմից Հայոց ցեղասպանության թանգարանում գողություններ կատարելու, հաստատության անվան տակ իրականացված փողերի լվացման, առանձնապես խոշոր չափի գումարների յուրացման, ֆինանսական փաստաթղթերի ոչնչացման դրվագների ուսումնասիրում, հաշվի առնելով այս դրվագներով հարուցած քրեական գործերի քննության արգելափակումը:

3. Գործող իշխանությունների կողմից իրականացվող հովանավորչության ու կոռուպցիոն բնույթի գործարքների արդյունքում որակյալ կրթություն ստանալու երեխաների իրավունքների կոպիտ խախտում, խոտանված ու անգրագետ դասագրքերի ներմուծում կրթական ոլորտ:

4. Գիտությունների ազգային ակադեմիայի գիտաշխատողների կողմից արտասահմանյան դրամաշնորհների միջոցով իրականացված հետազոտությունների արդյունքում ադրբեջանական հակահայ քարոզչությանը նպաստելու և ՀՀ անվտանգության համար սպառնալիք հանդիսացող «Արևմտյան Ադրբեջան» եզրույթի հիմնավորմանը նպաստելը:

5. ՀՑԹԻ նախկին տնօրեն Հարություն Մարությանի նախաձեռնությամբ իմ բնակության հասցեում գաղտնի տեսանկարահանումներ կամ մշտադիտարկում իրականացնելու, իմ սահմանադրական իրավունքների կոպիտ խախտման դրվագով իրավապահ մարմինների ու Մարդու իրավունքների պաշտպան գրասենյակի կողմից հետաքննություն չնախաձեռնելու փաստերի ուսումնասիրություն և ՀԽ դիրքորոշում այս ստոր գործելաոճի նկատմամբ:

Վերոնշյալ հարցերով հիմնական զեկուցող կարող է հանդես գալ Հանրային խորհրդի անդամ Ռուբեն Սաֆրաստյանը, հաշվի առնելով վերջինիս տեղեկացվածությունն ու առնչությունը վերոնշյալ թեմաներին:

Այս հարցերի բարձրաձայնումը նպատակ ունի ապահովել հանրային իրազեկվածությունը իրականացված ծանրագույն հանցագործությունների և հանրային գերակա շահի անտեսման ու ոտնահարման դրվագների շուրջ, բացառելով դրանց կոծկելու փորձերը:

Բոլոր գրությունների բովանդակությունները կհրապարակվեն բաց նամակի տեսքով»։