Էդ հողը փաստորեն ձեր սեփականությունը չի եղել, եկեք խոստովանեք. Փաշինյանը՝ Սյունիքի գյուղացիներին

Նիկոլ Փաշինյանն այցելել է Սյունիքի մարզ, ծանոթացել իրականացված և ընթացքի մեջ գտնվող ծրագրերին:

Փաշինյանի առաջին կանգառը եղել է Որոտան-Խոտ ավտոճանապարհը, որտեղ ծանոթացել է 10.3 կմ ընդհանուր երկարությամբ ավտոճանապարհի վերակառուցման աշխատանքներին:

Նա հանդիպել է նաև Սյունիքի գյուղացիների հետ, որոնք բողոքում էին, որ ճանապարհի կառուցման համար իրենց այգիները քանդվել են, և արդյունքում բազմաթիվ խնդիրներ են առաջացել։

«Էդ հողը փաստորեն ձեր սեփականությունը չի եղել, եկեք խոստովանեք, որ չի եղել, մենք էլ խոստովանենք, որ դու ծառեր եք ուենցել, մի լուծում գտնենք»,-արձագանքել է Փաշինյանը։

Այցի ժամանակ նա մասնակցել է նաև Շրջակա միջավայրի նախարարության Էկոպարեկային ծառայության Սյունիքի մարզային վարչության գործունեության մեկնարկի արարողությանը:

Նիկոլ Փաշինյանը հանդես է եկել ելույթով, դիմել միջոցառմանը ներկա օրենսդիր, գործադիր, իշխանության, տեղական ինքնակառավարման մարմինների ներկայացուցիչներին, Էկոպարեկային ծառայության աշխատակիցներին, կապանցիներին, շնորհավորել նրանց Էկոպարեկային ծառայության նորամուտի առիթով և նշել. «Ուզում եմ ընդգծել՝ այն փոփոխությունները, բարեփոխումները, որ անում ենք, առաջին հերթին վերաբերմունքի փոփոխության մասին են»:

Փաշինյանն ասել է, թե ենթակառուցվածք ստեղծելուն զուգահեռ, չափազանց կարևոր է նաև պատասխանատվության զգացումը. «Այս ծառայությունը նրա մասին չէ, որ մենք ուրիշներին չթողնենք, որ անտառը կտրի, որպեսզի մենք ավելի հաջողված կտրենք։ Այս ծառայությունը նրա մասին է, որ ծառի, անտառի, բնության, կենդանու, շրջակա միջավայրի նկատմամբ պետք է փոխվի մեր վերաբերմունքը և պետք է փոխվի մեր պատասխանատվությունը, և ուրիշ տարբերակ չկա»։