Մարզադպրոցների մարզիչների 5 %-ն է կարողացել հաղթահարել ատեստացիան. Ժաննա Անդրեասյան

«2023 թվականի ապրիլ ամսին անցկացվեց արտադպրոցական ուսումնական հաստատությունների մանկավարժական աշխատողների կամավոր ատեստավորումը, որին մասնակցել են նաև մարզադպրոցների մարզիչները,  որի մասնակցության ցուցանիշները և ստացված արդյունքները վկայակոչեցին վերապատրաստման գործող կարգը վերանայելու և արդիականացնելու անհրաժեշտությունը»,-կառավարության նիստում ասաց ԿԳՄՍ նախարար Ժաննա Անդրեասյանը:

Նախարարը զեկուցեց Հայաստանի Հանրապետության մանկապատանեկան մարզադպրոցներում աշխատող մարզիչ-մանկավարժների վերապատրաստման կազմակերպման ծրագիրը հաստատելու մասին որոշումը, որով նախատեսված վերապատրաստման գործընթացներին կներգրավեն նաև արտերկրի մասնագետներին։

Նա տեղեկացրեց, որ  երկու տարվա ընթացքում կամավոր ատեստացիաի է դիմել 272  մարզիչ և այն հաղթահարել է  55 հոգի, ինչը կազմում է ոլորտում աշխատողների 5 %-ը։

Անդրեասյանի խոսքով մարզչական գործունեությունը մարզիչ-մանկավարժից պահանջում է գիտելիքների և մասնագիտական կարողությունների անընդհատ զարգացում:

«Հայաստանում Հանրապետության մանկապատանեկան մարզադպրոցներում աշխատող, ինչպես նաև այլ մարզական կազմակերպություններում աշխատող մարզիչ-մանկավարժների ոչ հաճախակի որակավորման բարձրացումը խոչընդոտում են առաջատար մասնագետների  փորձի մուտքը ոլորտ, խոչընդոտում են նաև առաջխաղացմանը և մասնագիտական աճին:

Այս խնդրի լուծմանն է ուղղված մարզական կազմակերպությունների մարզիչ մանկավարժների վերապատրաստման գործընթացը:

Հաշվի առնելով նաև ռազմական վերջին իրադարձությունները, որի հետևանքով հաշմանդամություն ունեցող անձանց թվի կտրուկ աճ է գրանցվել, խիստ հրատապ և կարևոր խնդիր է զարգացնել ադապտիվ սպորտի ներառման գործընթացը:

Վերապատրաստման նոր կարգը ենթադրում է շարունակականություն բոլոր մարզաձևերի մարզիչ-մանկավարժների համար»,-ասվում է նախագծի հիմնավորման մեջ: