Եվրոպայում կակաոյի արտադրությունն ընկնում է՝ ռեկորդային թանկացման ֆոնին

Եվրոպայում կակաոյի արտադրությունը կտրուկ նվազել է՝ պայմանավորված հումքի գների պատմական բարձրացմամբ։ Ըստ Bloomberg-ի՝ 2025-ի երկրորդ եռամսյակում կակաոյի յուղի և փոշու արտադրությունը տարեկան կտրվածքով նվազել է գրեթե 5 տոկոսով՝ հասնելով համավարակից ի վեր նվազագույն մակարդակին։

Վերջին երկու տարում կակաոյի ֆյուչերսներն ավելացել են ավելի քան կրկնակի, իսկ 2024-ի դեկտեմբերին գները հասել են ռեկորդային սահմանի՝ վատ բերքի պատճառով։ Արդյունքում, շոկոլադի արտադրողները բարձրացրել են գները, փոփոխել բաղադրությունը՝ կակաոյի փոխարեն ավելացնելով լցոններ և բուսական յուղեր։

Համաշխարհային խոշորագույն մատակարարը՝ Barry Callebaut-ը, նախազգուշացրել է գլոբալ վաճառքների անկման մասին 2024–2025 ֆինանսական տարում՝ նշելով «աննախադեպ շուկայական ճնշումներ»։ Բացի դրանից, պահանջարկի թուլացումը և արտադրական ծախսերի աճը նվազեցրել են կակաոյի յուղի և փոշու արտադրության շահութաբերությունը։