Եթե ոչ խաղաղություն Թուրքիայի հետ, ապա ի՞նչ․ Փաշինյան

«Եթե չգնալ այն ճանապարհով, որը հաշտեցում է Թուրքիայի նման երկրի հետ, ապա ո՞ր ճանապարհով գնալ»։ Նման հարցադրում է արել Հայաստանի վարչապետ Նիկոլ Փաշինյանը հուլիսի 16-ի մամուլի ասուլիսի ժամանակ։

Նիկոլ Փաշինյանը հետաքրքրվել է, թե ինչի վրա են հույս դնում այն մարդիկ, ում զայրացնում են Թուրքիայի հետ հարաբերությունների կարգավորման ուղղությամբ իշխանությունների ջանքերը։ «Նրանք ուզում են ասել, որ Թուրքիայի նման երկրի հետ պետք է պատերազմի ճանապարհով գնա՞լ։ Մենք ընդհանրապես հասկանո՞ւմ ենք, թե ինչի մասին ենք խոսում», - հարցեր է շարունակել տալ Փաշինյանը։ Նա հավելել է, որ ներկա «հիբրիդային հարձակման» վտանգը կայանում է նրանում, որ հանրային բանավեճի մեջ նետվում են թեզեր, որոնց շուրջ այնպիսի աղմուկ է ստեղծվում, որ մարդկանց հնարավորություն չի տրվում հասկանալ այդ թեզերի էությունը։ Փաշինյանը նշել է, որ բազմիցս հայտարարել է այն մասին, որ Հայաստանը ձգտում է խաղաղության հաստատմանը և այսօր բոլոր ջանքերը գործադրվում են երկարաժամկետ խաղաղություն հաստատելու համար։ «Մենք կշարունակենք մեր ջանքերն այս ուղղությամբ։ Եվ ես կարծում եմ, որ Հայաստանի ժողովուրդն աջակցում է մեզ այս հարցում։ Ես ոչ թե պարզապես ենթադրում եմ դա, այլ վստահ եմ դրանում», - հայտարարել է նա։ Փաշինյանն ընդգծել է, որ խորհրդարանի ամբիոնից հնչեցրել է խաղաղության հասնելու ռազմավարությունը և հայտարարել, որ կշարունակի այն իրականացնել, իսկ եթե ժողովուրդը համաձայն չէ, ապա պետք է ապահովի իշխանության փոփոխությունը։ Այն փաստը, որ նրա հայտարարություններին հեղափոխություն չի հաջորդել, Նիկոլ Փաշինյանը կապում է իշխանությունների կողմից ձեռնարկվող բոլոր քայլերի հետ հասարակության համաձայնության հետ։