Շոյգուն հայտարարում է, որ Եվրոպան կարող է խաբել Թրամփին պաշտպանական ծախսերի հարցում

ՌԴ Անվտանգության խորհրդի քարտուղար Սերգեյ Շոյգուն պնդում է, որ եվրոպական երկրները կարող են փորձել խաբել ԱՄՆ նախագահ Դոնալդ Թրամփին՝ ձևականորեն կատարելով ՆԱՏՕ-ում իրենց վերցրած պարտավորությունները պաշտպանական ծախսերի ավելացման վերաբերյալ։ Այս մասին նա ասել է «Կոմերսանտ»-ին տված հարցազրույցում։

Շոյգուի խոսքով՝ Եվրոպան կարող է «թղթով» ցուցադրել աճ, սակայն իրական ներդրումները չեն համապատասխանելու խոստումներին։ Նրա խոսքով՝ սա արվելու է՝ զերծ մնալու Թրամփի հնարավոր պատժամիջոցներից և քաղաքական ճնշումներից։

Թրամփը նախկինում կոշտ դիրքորոշում է ունեցել ՆԱՏՕ-ի անդամների նկատմամբ՝ պահանջելով, որ նրանք իրականում կատարեն իրենց ֆինանսական պարտավորությունները։ Շոյգուի հայտարարությունը կարծես ազդանշան է, որ Մոսկվան ուշադիր հետևում է ՆԱՏՕ-ի ներսում հնարավոր պառակտումներին։