ԱՄՆ-ն սպառել է իր ժամանակակից THAAD հրթիռների պաշարների զգալի մասը․ CNN

ԱՄՆ-ն սպառել է իր առաջադեմ THAAD հակաօդային պաշտպանության հրթիռների պաշարների մոտ 25%-ը Իսրայելի և Իրանի միջև հունիսին տեղի ունեցած զինված հակամարտության ընդամենը 12 օրվա ընթացքում, հաղորդում է CNN-ը՝ հղում անելով աղբյուրներին։

Նշվում է, որ ԱՄՆ-ն ծախսել է 100-150 հրթիռ, ինչը զգալիորեն ավելի բարձր է, քան դրանց արտադրության տեմպը։ Անցյալ տարի երկիրը գնել է ընդամենը 11 հրթիռ, իսկ այս տարի կստանա ևս 12-ը։ 2026 թվականին ամերիկյան բանակը նախատեսում է գնել 37 հրթիռ։ Յուրաքանչյուր հրթիռի արժեքը մոտ 12,7 միլիոն դոլար է։

THAAD-ը շարժական համակարգ է, որը կարող է խոցել կարճ և միջին հեռահարության բալիստիկ հրթիռներ ինչպես Երկրի մթնոլորտում, այնպես էլ դրանից դուրս՝ իրենց թռիչքի վերջնական փուլում։ Ընդհանուր առմամբ, ԱՄՆ-ն իր զինանոցում ունի յոթ THAAD համակարգ, և դրանցից երկուսը օգտագործվել են Իսրայելում հակամարտության ժամանակ։