Իրանը թույլ չի տա ամերիկյան միջանցքի ստեղծում Կովկասում՝ Ռուսաստանի հետ կամ առանց նրա․ Ալի Աքբար Վելայաթի

Իրանի գերագույն առաջնորդի միջազգային հարցերով խորհրդական Ալի Աքբար Վելայաթին խիստ քննադատության է ենթարկել «Զանգեզուրի միջանցքի» նախագիծը, որը, նրա խոսքով, խթանվում է Միացյալ Նահանգների և նրա դաշնակիցների կողմից՝ Իրանի և Ռուսաստանի վրա աշխարհաքաղաքական ճնշում գործադրելու համար։

«Հարավային Կովկասը Թրամփի համար անտեր շրջան է՞ վարձակալելու համար։ Կովկասը աշխարհի ամենազգայուն կետերից մեկն է, և այդ երթուղին չի դառնա «Թրամփի երթուղի», այլ նրա վարձկանների գերեզմանատուն», - ասել է Վելայաթին։

Նա նաև միջանցքը վարձակալելու գաղափարը անվանել է «միամիտ անհեթեթություն» և համեմատել այն Պանամայի ջրանցքը վարձակալելու փորձի հետ. «Թրամփը, կարծես, իրեն համարում է անշարժ գույքի գործակալ, որը կարող է վարձակալության տալ հողեր և մի ամբողջ շրջաններ»։

Վելայաթիի խոսքով՝ միջանցքի նախագիծը նպատակ ունի մասնատել Հայաստանը և փոխել տարածաշրջանի աշխարհաքաղաքական քարտեզը։ Նա ընդգծել է, որ հայ ժողովուրդը կտրականապես դեմ է այդ ծրագրին՝ չնայած կառավարության անկայուն դիրքորոշմանը։ Վելայաթին նաև հիշեցրել է, որ Հայաստանի վարչապետը Իրան կատարած այցի ժամանակ համերաշխություն է հայտնել իրանական դիրքորոշման հետ և դեմ է արտահայտվել միջանցքի ստեղծմանը։

«Այս դավադրության իրականացումը կսպառնա ամբողջ Հարավային Կովկասի անվտանգությանը։ Իրանը կգործի տարածաշրջանային անվտանգության շահերից ելնելով՝ Ռուսաստանի հետ կամ առանց նրա», - ասել է խորհրդականը՝ հավելելով, որ Թեհրանը նախագիծը դիտարկում է որպես Իրանին և Ռուսաստանին շրջապատելու և մեկուսացնելու փորձ։