ԱՄՆ-ում կարող են սկսել ուկրաինացի փախստականների արտաքսումը

The Wall Street Journal-ը հայտնում է, որ ԱՄՆ-ն կարող է սկսել ուկրաինացի փախստականների արտաքսումը, եթե նրանք կորցնեն իրենց «ժամանակավոր իրավական պաշտպանության» կարգավիճակը։ Ըստ պարբերականի՝ արդեն այս ուրբաթ տասնյակ հազարավոր ուկրաինացիներ կարող են զրկվել այդ պաշտպանությունից։

Խոսքը վերաբերում է մոտ 120 հազար մարդու, որոնք վերջին երկու տարում ժամանել են ԱՄՆ «Եկեք միավորվենք հանուն Ուկրաինայի» (Uniting for Ukraine, U4U) ծրագրով։ Ծրագիրը մեկնարկել էր 2022 թվականի ապրիլի 21-ին և թույլ էր տալիս ուկրաինացիներին ու նրանց ընտանիքի անդամներին մուտք գործել ԱՄՆ և մինչև երկու տարի ժամանակավոր բնակության իրավունք ստանալ։

Այս տարվա սկզբին ԱՄՆ Միգրացիոն ծառայությունը դադարեցրել էր նոր դիմումների ընդունումը՝ հայտարարելով, որ գործընթացը կվերսկսվի միայն ծրագրի և փաստաթղթերի ներկայացման մեխանիզմների համապարփակ վերանայումից հետո։