AI մոդելները սպառնում են փոխարինել իրականներին

Vogue-ի օգոստոսի համարը նոր սկանդալի կենտրոնում է․ պարզվել է, որ Guess-ի գովազդային արշավում հայտնված մոդելները իրականում ստեղծվել են արհեստական բանականության միջոցով։ Լոնդոնյան Seraphinne Vallora գործակալության պատրաստած պատկերները TikTok-ում արագորեն դարձան քննարկման թեմա, երբ օգտատերերը բացահայտեցին, որ կատարյալ ժպիտով ու անթերի արտաքինով կանայք պարզապես գոյություն չունեն։

Հասարակական արձագանքը կոշտ էր․ շատերը պնդում են, որ նման մոտեցումը վտանգում է իրական մոդելների աշխատանքները և նորից բարձրացնում է անիրատեսական գեղեցկության ստանդարտներ։ Որոշ օգտատերեր նույնիսկ կոչ են արել բոյկոտել Guess-ը և Vogue-ը։ Բացի այդ, քննադատվում է նաև բազմազանության խնդիրը․ AI մոդելները հիմնականում սպիտակամորթ են և դասական գեղեցկության չափանիշներով, ինչը, ըստ մասնագետների, բերում է նոր «կեղծ» ներկայացման։

Միևնույն ժամանակ, տեխնոլոգիայի կողմնակիցները պնդում են, որ այն արագացնում է բովանդակության ստեղծումը և նվազեցնում ծախսերը։ Սակայն փորձագետները զգուշացնում են․ եթե չլինեն հստակ կանոններ և աշխատողների պաշտպանության մեխանիզմներ, AI-ի կիրառումը կարող է խորացնել շահագործումը նորաձևության ոլորտում։ Նյու Յորքի նահանգում արդեն ընդունված նոր օրենքը փորձում է կարգավորել մոդելների իրավունքները, սակայն մասնագետները ընդգծում են՝ սա միայն առաջին քայլն է։