Վաշինգտոնի ոստիկանապետը մնում է պաշտոնում՝ Թրամփի վարչակազմի հետ ձեռք բերված համաձայնությամբ

ԱՄՆ արդարադատության նախարարությունը և Վաշինգտոնի քաղաքային իշխանությունները պայմանավորվել են սահմանափակել Դոնալդ Թրամփի նախաձեռնած աննախադեպ փորձը՝ ստանձնելու մայրաքաղաքի ոստիկանության լիակատար վերահսկողությունը։ Դաշնային դատավորի միջամտությունից հետո կողմերը համաձայնել են, որ քաղաքապետ Մյուրյել Բաուզերի նշանակած ոստիկանապետ Փամելա Սմիթը կմնա իր պաշտոնում։

Թեև Թրամփի վարչակազմը փորձել էր ոստիկանության ղեկավարումը փոխանցել Թմրամիջոցների դեմ պայքարի վարչության (DEA) ղեկավար Թերի Քոուլին՝ նրան հայտարարելով «արտակարգ հանձնակատար», այժմ նրա դերը վերանայվում է։ Նոր հրահանգով նա կոչվում է արդարադատության նախարարի «ներկայացուցիչ» և ստանում սահմանափակ լիազորություններ՝ ներառյալ ներգաղթի հարցերում դաշնային գործակալությունների հետ համագործակցությունը։

Հիշեցնենք, որ Թրամփը հայտարարել էր Վաշինգտոնում «հանցավորության արտակարգ իրավիճակ» և ուղարկել էր Ազգային գվարդիայի զինվորներին փողոցներ։ Թեև պաշտոնական տվյալները ցույց են տալիս, որ 2024-ին բռնի հանցագործությունների մակարդակը հասել է վերջին 30 տարվա նվազագույնին, նախագահը պնդում է, որ անհրաժեշտ է խիստ միջամտություն։ Այս քայլը, որը քաղաքը որակել է որպես «ամենամեծ սպառնալիք Վաշինգտոնի ինքնակառավարման համար», արդեն վերածվել է իրավական և քաղաքական բախման, որը կարող է հասնել Կոնգրեսին և Գերագույն դատարան։