«Սև այրի»․ կինը 20 տարուց ավելի թունավորում էր ամուսիններին հանուն ժառանգության

Իրանում դատարանի առաջ է կանգնել 58-ամյա Կուլսում Աքբարին, որն ընդունել է 11 սպանություն և մեկ սպանության փորձ։ Քննիչների տվյալներով՝ նա երկու տասնամյակից ավելի ժամանակահատվածում ամուսնացել կամ համակեցել է մոտ 40 տղամարդկանց հետ՝ հիմնականում ապահովված և հիվանդություններով տառապող մարդկանց, որոնցից հետո արագ ժառանգում էր նրանց ունեցվածքը։

Աքբարիի «մեթոդը» սառնասրտորեն մտածված էր․ սկզբում նա ձևացնում էր հոգատար կնոջ, սակայն փոքր չափաբաժիններով ամուսինների սննդի մեջ ավելացնում էր ուժեղ դեղամիջոցներ։ Սկզբում նրանք հայտնվում էին հիվանդանոցում սրտային կամ ճնշման խնդիրներով, իսկ տուն վերադարձի դեպքում կինը մեծացնում էր դոզան, մինչև որ ամուսինն մահանում էր։ Քանի որ զոհերը հիմնականում տարիքով էին, մահվան պատճառը գրեթե միշտ վերագրում էին բնական պատճառներին կամ երկարատև հիվանդությանը։

Աքբարին դատավարության ընթացքում փորձել է արդարանալ «հոգեկան խանգարմամբ», սակայն փորձաքննությունը հաստատել է, որ նա լիովին առողջ է և գիտակցել է իր գործողությունները։ Այժմ դատարանը քննարկում է մահապատժի կիրառման հարցը․ զոհերի հարազատները պահանջում են ամենախիստ պատիժը։ Քննիչները չեն բացառում, որ իրական զոհերի թիվը կարող է լինել շատ ավելի մեծ, ինչպես նաև հնարավոր է, որ կային համախոհներ, որոնց դեռ փորձում են հայտնաբերել։