Կավելաշվիլին բողոքել է՝ ԱՄՆ-ը պատշաճ ուշադրություն չի դարձնում Վրաստանին

Վրաստանի նախագահ Միխեիլ Կավելաշվիլին ԱՄՆ նախագահ Դոնալդ Թրամփին ասել է, որ Վաշինգտոնը պատշաճ ուշադրություն չի դարձնում Թբիլիսիին։

«Ցավով պետք է ևս մեկ անգամ նշել, որ ձեր վարչակազմը պատշաճ ուշադրություն չի դարձնում Վրաստանին, ինչը, հաշվի առնելով կառավարությունների միջև արժեքների լիակատար համընկնումը, զարմացնում է վրաց հասարակությանը», - ասել է Կավելաշվիլին Թրամփին ուղղված բաց նամակում, որը հրապարակվել է Վրաստանի նախագահի վարչակազմի կողմից։

Կավելաշվիլիի խոսքով՝ Վրաստանի կառավարության ղեկավարները բազմիցս հայտարարել են, որ ԱՄՆ-ի հետ հարաբերությունների վերականգնումը և երկու երկրների միջև ռազմավարական գործընկերության հաստատումը մաքուր էջից՝ Վրաստանի արտաքին քաղաքականության հիմնական առաջնահերթություններից են։

Նշվում է, որ Թրամփի նախագահության մի քանի ամիսների ընթացքում Միացյալ Նահանգները սերտ հարաբերություններ է հաստատել Վրաստանի բոլոր հարևան երկրների հետ, սակայն «այս ֆոնին վարչակազմը ոչինչ չի ասում Վրաստանի մասին»։

«Դուք հաջողությամբ նպաստել եք Ադրբեջանի և Հայաստանի միջև խաղաղության համաձայնագրի կնքմանը, ակտիվորեն համագործակցում եք թուրքական իշխանությունների հետ և նույնիսկ վերականգնել եք գործընկերային հարաբերությունները Վլադիմիր Պուտինի հետ։ Սակայն այս ֆոնին Ձեր վարչակազմը ոչինչ չի ասում Վրաստանի մասին, ինչը, ինչպես արդեն նշել եմ, զարմացնում է վրաց հասարակությանը», - նշել է Կավելաշվիլին։

«Անձամբ ես, որպես Վրաստանի նախագահ, պատրաստ եմ առավելագույն հնարավոր ներդրում ունենալ Վրաստանի կառավարության կողմից հռչակված նպատակի իրականացման գործում՝ վերականգնել Վրաստանի և Միացյալ Նահանգների միջև ռազմավարական գործընկերությունը մաքուր էջից և կոնկրետ ուղեցույցով։ Այս նպատակին հասնելու անհրաժեշտ պայմանը վրացական պետության և վրաց ժողովրդի նկատմամբ ձեր վարչակազմի արդար և ուշադիր վերաբերմունքի հաստատումն է», - ընդգծվում է նամակում։