ՀՀ-ն իր քաղաքականության մեջ որևէ բան չի անի, որը միտված կլինի Իրանի դեմ․ Ալեն Սիմոնյան

Ալեն Սիմոնյանից լրագրողները հարցրին՝ Փաշինյանն Իրանի՞ն ու Ռուսաստանի՞ն էր ակնարկում, երբ հայտարարում էր, որ կան ուժեր թե՛ Հայաստանի ներսում և թե՛ դրսում, ովքեր ցանկանում են վիժեցնել խաղաղությունը, ինչին ԱԺ նախագահը բացասական պատասխան տվեց․ «Չէ, պետք չի կոնկրետ ինչ–որ մեկի վրա որպես վերնագիր, որպես անուն կենտրոնանալ։ Եկեք գլոբալ առումով նայենք։ Միշտ փոքր երկրները մեծ երկրների համար առևտրի և իրենց ազդեցության ոլորտները մեծացնելու կամ փոքրացնելու համար են եղել և գերտերությունները միշտ ձգտում են դառնալ մեծ ազդեցություն ունեցող և հակառակը՝ մյուսները փորձում են նրանց ազդեցությունը փոքրացնել և դա հեշտ է անել փոքր երկրների հաշվին։ Էդ պրոցեսը մշտապես կա և մենք բոլորս պետք է հասկանանք, որ մի պահ չգցվենք մեկ մի երկրի գիրկը, հետո այնտեղից գցվենք մեկ այլ երկրի գիրկը։ Բոլոր արտաքին կենրոններոն ունեն իրենց ազդեցության և շահի մասը»։

Նա նշեց՝ չգիտի, թե ինչու է ԱՄՆ–ն ակտիվացել Հարավային Կովկասում և արդյոք դա Իրանի կամ Ռուսաստանի դեմ է։

«Իրանի հետ հարաբերություններում որևէ մտահոգություն, որևիցե հարց, որը կարող է մեզ անհանգստացնել, այս պահին գոյություն չունի և չի կարող գոյություն ունենալ»,– ասաց Ալեն Սիմոնյանը։

Նա վստահեցրեց՝ ՀՀ-ն իր քաղաքականության մեջ որևիցե բան չի արել և չի անի, որը միտված կլինի մեր հարևաններից որևէ մեկի դեմ, այդ թվում՝ Իրանի։