Սահմանադրություն փոխելը մեր ներքին գործն է․ Սրբուհի Գալյանը՝ Բաքվի պահանջների մասին

ՀՀ արդարադատության նախարար Սրբուհի Գալյանն անդրադարձել է սահմանադրական փոփոխություններին՝ նշելով, որ Հայաստանի և շատ երկրների սահմանադրությունների նախաբանները նման են։

«Եթե մենք խնդիր չենք տեսնում մեր Սահմանադրության մեջ, և ասում ենք, որ այն, ինչ բարձրաձայնվում է, օրինակ՝ Ադրբեջանի կողմից, խնդիր չէ, և խնդիր չլինելու հավաստում տվել է նաև մեր Սահմանադրական դատարանը, որը միակն է, որ կարող է նման հավաստում տալ, ապա ի՞նչպես կարող ենք բարձրաձայնել դա որպես խնդիր այլ պետության համար․ դա բացարձակապես տրամաբանական չէ»–  լրագրողների հետ զրույցում ասաց Գալյանը։

Նա նշեց, որ ՀՀ Սահմանադրությունն Ադրբեջանի կողմից բարձրացված խնդիր չի պարունակում․ «Խնդրում եմ սահմանադրական բարեփոխումներն անընդհատ չկապել Ադրբեջանի պահանջի հետ, որովհետև դա իրականությունը չէ։  Խաղաղության պայմանագիրն արդեն նախաստորագրվել է, խաղաղությունը հաստատվել է, իսկ Սահմանադրությունը մեր ներքին գործն է, մեր ժողովրդի գործն է»,– ասաց նախարարը։