Ադրբեջանի կողմից կառավարական մակարդակով ատելության տարածումը հրահրում է ահաբեկչության. Կարեն Նազարյան

Հունվարի 15-ին ՄԱԿ-ի Անվտանգության խորհրդում տեղի են ունեցել քննարկումներ «Ահաբեկչության դեմ պայքարի համապարփակ մոտեցում» խորագրով, որին մասնակցել է շուրջ 50 պետություն, այդ թվում՝ Հայաստանը և Թուրքիան:

Հանդիպումը բացվել է ՄԱԿ-ի գլխավոր քարտուղար Բան Կի Մունի հայտարարությամբ, որում ասված էր. «Ոչինչ չի կարող արդարացնել ահաբեկչությունը»: Հանդիպման ժամանակ ելույթ է ունեցել նաև Հայաստանի ներկայացուցիչ Կարեն Նազարյանը:

Կարեն Նազարյանը նշել է, որ ահաբեկչության հաղթահարման համար անհրաժեշտ են համագործակցություն և կորդինացված քայլեր ՄԱԿ-ի ենթակայության ներքո գտնվող տարբեր հակաահաբեկչական և միջազգային այլ կազմակերպությունների կողմից: Հայաստանը արդյունավետորեն համագործակցում է միջազգային հանցագործության և ահաբեկչության դեմ պայքարի կազմակերպությունների հետ օրենսդրական և սահմանային հսկողության դաշտում բարեփոխումներ կատարելու նպատակով: Հայաստանը ընդունել է մաքսային հսկողության գործնական և արդյունավետ չափորոշիչներ և քայլեր է ձեռնարկում նոր տեխնոլոգիաների ձեռքբերման ուղղությամբ: Սակայն, որոշ հարևանների հետ փակ սահմանները բացասաբար են ազդում համագործակցության վրա:

Չնայած Հարավային Կովկասում հակամարտությունը դեռևս չի լուծվել՝ դրան զուգահեռ տեղի է ունենում զենքերի լայնամասշտաբ ձեռքբերում, հաճախ անգամ միջազգային պայմանագրերի խախտման միջոցով: Նա ավելացրել է նաև, որ ահաբեկչությունը չպետք է հավասարեցվի ինքնորոշման համար պայքարին՝ դատապարտելով իրավունքների ճնշման նպատակով կառավարական ուժերի ներգրավումը:

Ներկայացնելով, որ առկա պայմաններն օժանդակում են ահաբեկչության տարածմանը՝ բանախոսը նշել է, որ ատելության տարածումը կառավարական մակարդակով հրահրում է ահաբեկչության. այն պետք է փոխարինվի հանդուրժողականությամբ և բանակցություններով: