«Ազգ». Ի՞նչն է խոչընդոտում զբոսաշրջության զարգացմանը

Պրահա-Երեւան չվերթը 200 դոլարով ավելի թանկ է, քան Պրահա-Թբիլիսին

«Ոչ միայն տուրիզմի ոլորտի ծառայությունները, այլեւ ավիատոմսերի գներն են շատ թանկ Հայաստանում»: Դիտարկումը Հայաստանում ԱՄՆ դեսպան Ջոն Հեֆերնինն է: Նա առաջարկում է զբոսաշրջային փաթեթ կազմելիս հաշվի առնել, թե զբոսաշրջիկը քանի ժամ է սպասում այս կամ այն օդանավակայանում: 15 ժամ որեւէ երկրի օդանավակայանում սպասող զբոսաշրջիկը չի ցանկանա Հայաստան այցելել: Այս առումով քաղավիացիայի ոլորտում անհրաժեշտ են դրական տեղաշարժեր: Հեֆերնը համոզված էՙ քաղավիացիայի ոլորտի ազատականացումը կբերի գների նվազմանը, ինչն էլ իր հերթին կխթանի զբոսաշրջության զարգացումը: Ոլորտը զարգացնելու համար դեսպանն առաջարկում է ստեղծել նոր աշխատատեղեր հանրապետության ամբողջ տարածքում եւ ներկայացնել պատմամշակութային ժառանգությունը: Հայաստանում աշխատելու 18 ամսվա ընթացքում բացահայտել է մի նոր երկիր. «Ես ու կինս սիրահարված ենք Հայաստանին: Սակայն որքան էլ Հայաստանը գեղեցիկ լինի, եթե ավիատոմսերն ու հյուրանոցների գները թանկ լինեն, ոչ մի զբոսաշրջիկ Հայաստան չի այցելի: Օդանավակայանը սահմաններից մեկն է, որ վերահսկվում է Հայաստանի կողմից: Սակայն պետք է բացել բոլոր ճանապարհները, որպեսզի լինի մրցակցություն, տուրիզմի զարգացման համար առկա ծրագրերը հաջողության հասնեն: Մրցակցության բացակայությունը ավիացիոն ոլորտում խոչընդոտում է, որ Հայաստանը դառնա տարանցիկ երկիր»:

Դեսպանի բնութագրմանը, որ Հայաստանում հյուրանոցները թանկ են, համաձայն չէ Էկոնոմիկայի փոխնախարարի պաշտոնակատար Արա Պետրոսյանը : Նա շեշտում է, որ իրենք հետազոտություն են կատարել, պարզվել է, որ Հայաստանի հյուրանոցները 10-15 տոկոսով ավելի էժան են, քան նույն կարգի հյուրանոցների գները Վրաստանում: Ըստ Պետրոսյանիՙ հայերը նախընտրում են Վրաստանում անցկացնել իրենց հանգիստը, որովհետեւ այնտեղ է Սեւ ծովը, որը ցածրադիր գոտում է, ի տարբերություն Սեւանա լճի եւ բարձրադիր կուրորտի, որն առաջարկում է Հայաստանը: «Դրանք տուրիստական երկու տարբեր առաջարկներ են»:

Արա Պետրոսյանի խոսքերովՙ ազգային ավիափոխադրողի սնանկությունը զբոսաշրջության տեսանկյունից որեւէ կերպ չի ազդել Հայաստան կատարվող այցելությունների վրա: «Իրավիճակը հսկում է կառավարությունը: Մշտական կապի մեջ ենք մասնավոր հատվածի հետ, ովքեր կազմակերպում են տուրիստական այցելություններ Հայաստան: Այս պահի դրությամբ տուրիստական հոսքերի կրճատման կամ չեղյալ հայտարարագրված ամրագրումների վերաբերյալ բողոքներ չենք ստացել: Դա նշանակում է, որ թռիչքների հաճախականությունն ավելացնելու հնարավորություն ստացած ավիաընկերությունները փակեցին այն ամբողջ շուկան, որը նախկինում ինչ-որ ձեւով տիրապետում էր «Արմավիան»:

Փոխնախարարի պաշտոնակատարի խոսքերովՙ «Արմավիան» վերջին շրջանում դուրս էր շատ շուկաներից, եւ ձեւավորվել էր իրավիճակ, որ նրա դուրս գալը մեծ էքսցեսներ չպետք է առաջացներ:

Փոխնախարարի պաշտոնակատարի հայտարարություններին համաձայն չեն տուրիստական գործակալությունների ղեկավարները

«Ազգ»-ի հետ զրույցում «Ամիստադ տուր» տուրիստական ընկերության հիմնադիր տնօրեն, Ներգնա տուրօպերատորների ասոցիացիայի նախագահության անդամ Արմինե Ադամյանը վստահ է, որ ուղիղ չվերթերն ու տոմսերի էժան գները դրական կանդրադառնան տուրիստական ոլորտի զարգացման վրա: Նա առաջնահերթ է համարում լուծել ավիաուղիների հարցը, անցկացնել ուսումնասիրությունՙ պարզելու, թե ինչու է նույն ավիաընկերության տոմսի արժեքը Վրաստանում ավելի էժան, քան Հայաստանում: Նա օրինակ է բերում Պրահա-Երեւան եւ Պրահա-Թբիլիսի չվերթերի տոմսի արժեքների տարբերությունը: Պրահա-Երեւան չվերթը 200 դոլարով թանկ է Պրահա-Թբիլիսի չվերթից:

Ըստ Ադամյանիՙ «Արմավիայի» սնանկացումից հետո տոմսերի գները կտրուկ բարձրանում են եւ հաճախ տատանվում: Եթե այս իրավիճակը երկար շարունակվի, ապա բացասաբար կանդրադառնա զբոսաշրջության զարգացման վրա, եւ զբոսաշրջիկների թիվը կկարճատվի: Ադամյանն առաջարկում է չմոռանալ, որ շուտով կսկսվի զբոսաշրջության ամենաթեժ սեզոնը, ու եթե ավիաուղիների հարցը չկարգավորվի, պետությունը զբոսաշրջիկների շատ սակավաթիվ զանգվածի կընդունի:

Նա հավաստիացնում է, որ հյուրանոցների կառուցմամբ զբոսաշրջության զարգացումն առաջխաղացում է ապրում: Հայաստան եկող զբոսաշրջիկների մեծ մասն այցելում է Արցախ եւ հիացած վերադառնում:

«Հայաստանում ամեն ինչն էլ թանկ է», ասում է «Եվրազիա ինթերնեյշնլ թրավել» տուրիստական գործակալության գործադիր տնօրեն Գագիկ Մկրտչյանըՙ հավելելով, որ Հայաստանում թե՚ ավիատոմսերն են թանկ, թե՚ ծառայությունների գները: Բացի դրանից, առկա է զբոսաշրջիկի հանդեպ «յուրահատուկ» վերաբերմունք: Մկրտչյանը հիշում է, որ մի անգամ տաքսին զբոսաշրջիկներին «Մոնումենտից» Հանրապետության հրապարակ հասցնելու համար պահանջել էր 4000 դրամՙ պատճառաբանությամբ, որ մեքենայի մեջ 4 հոգի են նստած, մինչդեռ Երեւանում տաքսիների վճարը ոչ թե ըստ ուղեւորների քանակի է, այլ ըստ կիլոմետրի: «Ընդամենը մի քիչ ցանկություն եւ աշխատանք ու Հայաստանը կկարողանա տարեկան մեկ միլիոն տուրիստ ընդունել: Մեր երկիրը ոչ միայն ունի պոտենցիալ եւ ռեսուրսներ, այլեւ եղանակային պայմաններն այնպիսին են, որ տարվա չորս եղանակներին էլ հնարավոր է զարգացնել զբոսաշրջությունը: Սակայն որպեսզի զբոսաշրջիկների թիվը շատանա, նրանք պետք է Հայաստանից գոհ վերադառնան, քանի որ նրանք կենդանի գովազդ են», ասում է Մկրտչյանըՙ հավելելով, որ դեռ ահագին աշխատանք կա կատարելու: