Գևորգ Աճեմյանը պաշտոնանկ է արվել ԼՈւՐԵՐ.com-ի հրապարակման հիման վրա
Բլոգոսֆերա
«Իրազեկ քաղաքացիների միավորում» հասարակական կազմակերպության լրագրող Տիրայր Մուրադյանը ֆեյսբուքի իր էջում գրում է.
«Կհիշեք, կառավարության գործերի կառավարիչ Գևորգ Աճեմյանի պաշտոնանկության թեման: Քանի որ կառավարությունն իր նախաձեռնությամբ չպարզաբանեց, թե ինչ հանգամանքներում է վերջինս ազատվել աշխատանքից և ինչ դերակատարություն է նա ունեցել «Աշտարակ կաթ» ապրանքային նշանի գզվրտոցում, գրավոր հարցմամբ պարզեցի.
««Աշտարակ կաթ» ապրանքային նշանի շուրջ ծագած վեճի քննարկումը պատճառ է դարձել, որպեսզի Վարչապետի աշխատակազմի գործերի կառավարիչ Գևորգ Աճեմյանն իր դիմումի համաձայն ազատվի զբաղեցրած պաշտոնից: Վարչապետի աշխատակազմում քննարկվել է Ձեր կողմից նշված հրապարակումը (ԼՈՒՐԵՐ.com-ի հրապարակման մասին է խոսքը) և արժանացել բացասական գնահատականի». կառավարության լրատվական վարչության պետի տեղակալ Արմեն Խաչատրյան»:
Մյուս սկսնակ և անփորձ երիտպաշտոնյաները թող այս պատմությունը նկատի ունենան հետագայի համար»,- գրել է նա:
Հիշեցնենք՝ ԼՈւՐԵՐ.com-ին հայտնի էր դարձել, որ օրերս Գևորգ Աճեմյանն իր մոտ է հրավիրել «Աշտարակ Կաթ» ապրանքային նշանի սեփականատեր «Պարգև» ՍՊԸ ղեկավարներին և գրեթե սպառնալիքի տոնով հորդորել նրանց կարճ ժամկետներում Աշտարակ Կաթ ապրանքային նշանը հետ վերադարձնել «Աշտարակ Կաթ» ՓԲԸ նախկին սեփականատեր Աշոտ Ափոյանին և ազատել գործարանի տարածքը, սպառնալով, որ հակառակ պարագայում հարցին կխառնվի ԱԱԾ-ն։
Հրապարակումից օրեր անց՝ հուլիսի 17-ին, վարչապետ Նիկոլ Փաշինյանի գործերի կառավարիչ Գևորգ Աճեմյանը հրաժարականի դիմում էր ներկայացրել:
Ամենադիտված 
Մնաս բարյավ. Րաֆֆի Հովհաննիսյան
