Ոստիկանները գողացել են անգամ օգտագործված օծանելիքը. փաստաբանները չգիտեն, թե ուր է այս պահին «Վստրեչի Ապեր»-ը (տեսանյութ)

«Վստրեչի Ապեր» մականունով հայտնի Արամ Վարդանյանի տան խուզարկությունից հետո կան մի շարք բերման ենթարկվածներ և ձերբակալված 2 անձ: Այս մասին լրագրողների հետ զրույցում ասացին փաստաբաններ Լուսինե Սահակյանն ու Երվանդ Վարոսյանը:

Փաստաբանը նշեց, որ Արամ Վարդանյանի որդին բերման է ենթարկվել, եղբորորդին՝ ձերբակալվել։

Նրանց խոսքով՝ մինչ տանն իրականացված գործողությունները և դրանից հետո, հանդիպել են Արամ Վարդանյանին, իսկ ոստիկանության գործողություններից հետո տեղյակ չեն, թե որտեղ է նա գտնվում: «Ոստիկանները Վարդանյանին պատկանող տներ են մտել պատերի վրայով, դռները ջարդելով: Մի շարք հափշտակություններ են արել, այդ թվում՝ օծանելիքի կիսադատարկ շշեր, ոսկյա զարդեր», - նշեց Սահակյանը:

Փաստաբանները նշեցին, որ ոստիկանները որևէ փաստաթուղթ չեն ներկայացրել, որով՝ որոշում ունեն խուզարկություն կատարելու. «Միայն գիտենք՝ 2016թ. ինչ-որ գործի շրջանակում է արվել, բայց թե ինչ գործի՝ մեզ չեն տեղեկացրել»,- ասաց Վարոսյանը:

Ավելի վաղ տեղեկացրել ենք, որ գիշերը ժամը 02.40-ի սահմաններում, ոստիկանության հարյուրավոր աշխատակիցների կողմից տեղի է ունեցել հարձակում՝ Արամ Վարդանյանին և նրա հարազատներին պատկանող Արցախի փողոցի 17 հասցեում գտնվող տների վրա։